CNRT: Hakarak Hatene Tipu Covid-19 Iha TL, Odete: TL Laiha Virus

Bankada CNRT Deputada Virgina Ana Belo husu ba Ministeriu Saude (MS), atu esplika tipu Covid-19 iha Timor Leste naran saida, tanba moras nia daet lahanesan ho nasaun sira seluk. (Dok: STL)

DILI, STLNEWS.co – Bankada CNRT Deputada Virgina Ana Belo husu ba Ministeriu Saude (MS), atu esplika tipu Covid-19 iha Timor Leste naran saida, tanba moras nia daet lahanesan ho nasaun sira seluk.

Nia dehan, kaer ba relatoriu ka dadus sira neebe husi nasaun vizinu i nasaun tomak iha mundu nian kona ba oinsa moras nee ho nia intensidade neebe daet makas halo ema preokupa.

“Hau kaer ba realidade neebe akontese iha ita nia rai hau la hatene, tanba nee husu ba Governu kompetente ba area ida nee, tipu Covid-19 iha ita nia rai ho naran saida, iha ka lae diferensia ho nasaun sira seluk, tanba ita haree akontese iha nasaun seluk moras nee daet laos halimar, loron ida ema bele hetan pozitivu too rihun 100 resin, nee signifika moras nee bele mai husi anin,” dehan nia liu husi Plenaria iha PN, Dili, Kuarta (27/01/2021).

Deputada nee afirma, iha Indoneszia sira uza fali ona mekanismu foun ema atu komprementa malu, lori liman maka tuku malu mos labele tiha ona.

“Hau koalia hanesan nee tanba saida maka akontese iha ita nian, ema negativu ba toba iha izolamentu pozitivu nia sai ba mos diak hela, no ema pozitivu hela hamutuk negativu mos diak hela, i ema balu pozitivu sai tiha ona ba liur hela hamutuk ho familia ba foti fali mai mos diak hela,” tenik nia.

Hatan ba kestaun nee Ministra Saude, Odete Maria Freitas Belo hatete, kona ba tipu virus ida neebe Timor iha. “Ita laiha virus no virus nee la mai husi ita, maibe virus nee mai husi nasaun Xina no virus neebe maka ita konese durante nee to tempu ida agora nee maka SARS-CoV-2 laiha tan virus seluk,” dehan nia.

Reportajen: Domingas Soares/ Guilhermina Franco
Editora: Carme Ximenes

LEAVE A REPLY

Please enter your comment!
Please enter your name here