Corona Virus Manipulasaun Politika

Foto: Espesial

DILI, STLNEWS.co – Pasiente Covid-19 konsidera Corona Virus ou Covid-19 iha Timor Leste hanesan manipulasaun politika, tanba sira neebe hela izolamentu diak hela.

Kestaun nee hatoo husi fontes konfirmadu neebe hela iha izolamentu Tasi-Tolu, ba STL via telefone, Segunda (22/03/2021).

Fontes konfirmadu nee hatete, nia sente moras Covid-19 iha Timor Leste nee hanesan manipulasaun deit, tanba sira iha izolamentu kondisaun diak hela.

“Ita bele hatete nee politika deit, se Sentru Integradu dehan nee Covid-19, entaun ita tenke lao tuir nia regra, iha liur implementa katak distansia sosial, pois lolos dehan ami pozitivu ona labele besik malu, maibe ami mai hamutuk loos hanesan loos iha uma nee no laiha parte saude ida mai atu hase netik ami ka konsola ami lae, ekipa ida mak dader, meudia mai fo hahaan, kalan koko tensaun hotu, ami nain haan haris, tebe bola, halo atividade saida deit halo deit, laiha ema ida mak fo korajen,” hatete nia.

Nia hatutan, durante iha izolamentu lao livre hela no halo atividade tuir sira nia hakarak no nia konsidera nee laos izolamentu, maibe nee hanesan politiza.

Kuandu Covid-19 duni, loloos nee ema toba hakmatek idak idak nia no labele lao ba mai, maibe iha Timor izolamentu mak fatin atu haan toba no koko tensaun nee deit, ekipa saude mos lahalo tratamentu ba sira ou fahe aimoruk Covid-19 ba pasiente sira.

“Ami hakarak hatene Covid-19 nee tebes ka ou manipulasaun, tanba saida tula ami mai husi uma mai iha nee laos hau mesak deit, mai iha nee ami barak, labarik kiik mos mai butuk hamutuk feen laen tau hamutuk ho ami, depois ami neebe mak hela kleur ona nee mai tau hamutuk deit, nee apakah Covid-19 ka ida nee politiza?” hatete nia.

Nunee mos pasiente seluk neebe mak lakoi temi naran hatutan, nia lasatifas ho atendementu husi ekipa saude, tanba durante pasiente sira nee iha izolamentu la iha mediku ida mak atu atende sira.

“Ami iha nee lasatisfas ho atendementu mediku sira husi ekipa saude neebe mak iha nee, depois durante ami loron sanulu resin haat (14) iha nee, la iha ema ida mak dehan atu mai atende ami hanesan mediku,” hatete pasiente konfirmadu nee.

Nia haktuir, agora sira lian laek laiha ema ida para rona sira nia lian, se nu kazu la iha ema ida mak bele publika sira nia lian ba publiku, para hatene sira nia situasaun loloos iha izolamentu.

Pasiente nee klarifika katak, durante tama iha izolamentu too agora nunka simu aimoruk konaba moras Covid-19 nian no sira mak haan, hemu, toba, no koko mak tensaun deit.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here