Covid-19 Halo Ema Lakon Empregu

Surtu Covid-19 neebe seidauk remata iha mundu, halo ema barak lakon empregu no lakon oportunidade movimentasaun ba mai ho diak. (Dok. STL)

DILI, STLNEWS.co – Surtu Covid-19 neebe seidauk remata iha mundu, halo ema barak lakon empregu no lakon oportunidade movimentasaun ba mai ho diak.

Eis Deputadu bankada PD iha terseira lejislatura, Virgilio Hornai hatete, tuir informasaun neebe iha agora purvolta 53 milaun resin populasaun neebe afetadu ona husi surtu Covid-19, hodi halo ema barak lakon empregu no oportunidade movimentasaun ba mai.
“Hau hanoin Surtu COVID-19 nee, halo ema barak mak lakon empregu no movimentasaun ba mai,” dehan Virgilio ba STL, iha Surikmas, Dili, Segunda (16/11/2020).

Nia dehan meus atu ema barak labele lakon empregu mak presiza iha politika fisikal ida ba apoiu setor privadu ho jurus neebe kiik para ekonomia bele nafatin lao.

Maibe Virgilio mos husu ba governu taka fronteira trestre no vou ba mai ho aviaun entre nasaun inklui Polisia Patroliamentu Fronteira atu tau seguransa masimu ba movimentasaun ema ilegal sira neebe passa iha fronteira.

“Ita husu ba governu taka fronteira trestre no vou ba mai ho aviaun entre nasaun no husu mos ba Polisia Patroliamentu Fronteira atu tau seguransa masimu ba movimentasaun ema ilegal sira neebe passa iha fronteira,” dehan nia.

Tanba tuir nia katak, bainhira ema ilegal sira nee tama mai halao teste no karantina ba sira, para nunee bele evita moras nee iha rai laran.*

Reportajen: Carme Ximenes
Editor: Ekipa STL

LEAVE A REPLY

Please enter your comment!
Please enter your name here