Covid-19 Lahamate Fiar Ba Maromak

Padre Richardo Pasang, SVD. (Foto: STL/Emerenciana Pinto)

DILI, STLNEWS.co – Padre Richardo Pasang, SVD, maski Covid-19 seidauk remata iha mundu, maibe lahamate sarani sira nia fiar ba maromak.

“Interesante tebes wainhira hau haree notisia jornal STL neebe hatun sarani ida naran Armenio Aleixo da Silva dehan katak Timor Fiar Mihis hasoru Covid-19. Ba hau, sarani ida nee hatoo nia sentimento espiritual no mos dezafius real neebe nia hasoru iha tempu ida nee wainhira atividades espiritual suspende tanba Covid-19,” hatete Padre Richardo ba STL, via telefone, Segunda (11/01/2021).

Nia dehan, desizaun estadu dala ruma la fo satisfas ba ema barak nia hakarak inklui ema nia hakarak espiritual neebe kuda ona iha sarani sira, tanba nee liu husi midia ida nee hakarak hatoo katak pandemia Covid-19 mak dezafiu humana no mos dezafiu fiar sarani nian.

“Perguntas ba ita, “apakah pandemia Covid-19 halakon ita nia fiar neebe ita kuidadu husi ita moris too agora?”, hau hanoin lae, maibe, pandemia Covid-19 dezafia ita hotu sarani hodi husu ba ita nia an, oinsa ita nia abut fiar ba Maromak iha tempu pandemia nee nia laran,” hatete Padre Richardo.

Padre hatutan, ema hotu tauk no lakohi atu covid-19 daet ba ema barak iha Timor Leste maibe la bele tauk demais, ho fiar katak situasaun sei lao liu iha nasaun doben ida nee se sarani tau nia fiar ba Maromak maske laiha Missa hamutuk iha igreja nuudar familia katolika.

Bibi Atan Kreda katolika nee hatutan tempu nee mak oportunidade diak ida ba sarani tomak, familia religiaun oi-oin atu hakbesik malu, halibur membru familia sira hodi konstrui relasaun intimidade nuudar familia no intimidade espiritual iha familia laran atu hametin liu tan fiar ba Maromak, ho grasa Maromak nian, katak lalika paniku demais ba situasaun ida nee ho fiar katak situasaun nee sei lao liu iha sarani nia leet.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here