Covid-19 NTT Sae, Reforsa PNTL Iha Fronteira

Komandante Jeral PNTL Komisariu PNTL Faustino da Costa hatete, sei reforsa tan membru PNTL ba iha lina fronteira, nunee bele apoiu halo kontrolu ba movimentu ilegal liu liu ba fatin sira neebe deskonfia ema tama sai ilegal. (Foto: STL/Alberto Menezes)

DILI, STLNEWS.co – Komandante Jeral PNTL Komisariu PNTL Faustino da Costa hatete, sei reforsa tan membru PNTL ba iha lina fronteira, nunee bele apoiu halo kontrolu ba movimentu ilegal liu liu ba fatin sira neebe deskonfia ema tama sai ilegal.

Kestaun nee komisariu PNTL, Faustino hatete, wainhira hasoru malu ho Primeiru Ministru (PM), Taur Matan Ruak, iha Palasiu Governu Tersa (19/01/2021).

“Ida nee ohin aprezenta ba Primeiru Ministru, aliende ita iha postu permanente sira neebe iha no balun ita aumenta ona iha fulan hirak kotuk ba, no postu balun sei aumenta tan iha tempu badak nia laran,” dehan Komisariu Polisia Faustino.

Komisariu PNTL nee dehan, sei halo mos komunikasaun ho autoridade munisipiu liu liu autoridade lokal sira neebe hela besik fronteira, nunee bele apoiu UPF halo seguransa ba fronteira sira.

“Parte ida ita mos sei kolia ho Prezidente Autoridade, liu liu autoridade lokal sira neebe hela besik iha lina fronteira katak kestaun seguransa nee presiza ita hotu nia kontribuisaun, tanba moras Covid-19 nee perigu tebes ba ema hotu nia vida, tanba nee husu komunidade sira atu labele halo atividade ilegal iha Lina fronteira,” nia esplika.

Enkuantu kona ba kondisaun membru membru PNTL sira neebe iha fronteira Komisariu PNTL nee dehan, dadaun iha kooperasaun ho ajensia dezenvolvimentu hodi apoiu tuir kondisaun neebe PNTL hasoru.

“Ita bot sira hatene katak ita iha kooperasaun ho parseiru dezenvolvimentu no sei haruka nesesidade neebe mak membru PNTL sira presiza tuir kondisaun neebe Ita hasoru, aliende husi parseiru sira ita mos sei harii tan postu foun ba UPF nian tuir orsamentu ba tinan 2021 nee, tanba nee wainhira ita kria uluk kondisaun ba membru sira sera ke moras nee hein atu kondisaun iha tia mak nia mai ga oinsa.” nia esplika.*

Reportajen: Alberto Menezes
Editora: Carme Ximenes

LEAVE A REPLY

Please enter your comment!
Please enter your name here