Deskonfia Kazu Pozitivu Corona Ida

Adjuntu Komandante KPMD, Superintedente Xefe Euclides Belo. (Foto: STL/Efizenia da Costa)

DILI, STLNEWS.co – Deskonfia Timor-Leste dadaun nee rezista kazu pozitivu Corona Virus (COVID-19) nain ida, no agora izola iha fatin izolamentu Sentru Saude Vera-Cruz.

Adjuntu Komandante Komandu Polísia Munisípiu Dili (KPMD), Superintendente Euclides Belo relata, polisia no ekipa saúde akompaña sidadaun ida neebe deskonfia suspeita pozitivu COVID-19 lori mai izola iha fatin izolamentu Vera Cruz.

“Iha Otél Farol iha ita nian OPS hamutuk ho Seguransa Polisia neebe mak koloka iha Otél servisu hamutuk ho parte saude nian, liliu husi parte saude nian tuir informasaun neebe mak PNTL simu, katak suspeita sidadaun ida neebe deskonfia katak pozitivu COVID-19,” dehan nia iha knaar fatin, KPMD, Caicoli-Dili (28/09/2020).

Maibe nia hatete, atu hatene lolos kona ba sidadaun nee pozitivu COVID-19, nee parte Ministeriu Saude mak bele klarifika lolos, tanba nee mak bele konfirma Diretora Saúde Munisipiu Dili nian ho ekipa sira neebe mak hosi Ministeriu Saude.

“Realmente sidadaun refere PNTL akompana agora dadauk, tama ona izolamentu klinika Vera Cruz nian,” tenik nia.

Nia hatutan enkuantu konaba sidadaun nee nian nasionalidade no tama mai Timor sa loron, Komandante saidauk iha informasaun detail, maibe tuir informasaun neebe mak diariu nee hetan katak, sidadaun refere mai husi Indonezia neebe mak durante nee halo atividade iha Timor.

“Ita sedauk hatene lolos sidadaun nee mai husi neebe no tama sa loron, tanba nee mak ami sei hein dadus lolos depois mak ami nia Seksaun Patriamentu Vera Cruz relata mai ami,” hakotu Euclides.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here