Ekipa Saude Tun Urjente Swab Komunidade Bairo Beten 2

Ekipa saude halo teste swab ba komunidade Bairo Beten 2, Sabadu (06/03/2021). [Foto: Madalena Horta]

DILI, STLNEWS.co – Relasiona ho kazu pozitivu Covid -19 foin dadauk detekta iha Munisipiu Baucau, kazu nee nia hela fatin iha Suku Madohi, Aledeia Terra Santa, no Bairo Beten 2 (B2).

Konsidera katak risku iha bairo nee iha, tanba nee ekipa saude koopera ho autoridade lokal sira hodi tun mai halo swab, komunidade sira neebe hela iha bairo B2 liu husi foti sampel ida mak foin hatene loloos komunidade nia saude.

Ba STL Sabadu (06/03/2021), Koordenadora Pilar 3 Covid-19, Josefina Clarinha João, hateten, relasiona ho kazu provavel neebe foin dadauk akontese iha Baucau maibe nia hela fatin iha area Tasi Tolu, Beten 2, nee mak parte saude tun urjente atu halo swab ba komunidade sira iha bairo ida nee, tanba ema hotu hakarak prevene aan husi pandemia surtu Covid-19.

Koordenadora Pilar 3 Covid-19, Josefina Clarinha João. (Foto: Espesial)

“Ohin loron ami ho ekipa tomak mai iha fatin ida nee, relasiona ho kazu ikus neebe detekta iha munisipiu Baucau, tanba ema nee nia hela fatin iha area Tasi Tolu, bairo Beten 2. Ho kazu provavel nee ami deskonfia katak risku iha bairo nee iha, maibe atu hatene loloos risku nee iha ou laiha mak ita tenke liu husi teste ida, tan nee ohin ami nia ekipa tun hodi halo teste swab, ho nunee bele hatene lolos komunidade sira nia kondisaun,” dehan Koordenadora Pilar 3 Covid-19, Josefina Clarinha João ba STL Sabadu (06/03/2021).

Kordenadora nee mos husu ba komunidade neebe hela iha Bairo Beten 2 atu koopera hamutuk ho parte saude, oinsa organiza ida-idak nia familia hodi ba tuir hotu swab, tanba ida nee hanesan oportunidade diak atu ema ida-idak bele hatene nia moras, tanba amostra neebe parte saude foti nee, sei lori ba iha laboratoriu hodi halo teste, karik iha moras ruma mak parte saude sei fo informasaun fali mai iha autoridade lokal, hodi fo sai rezultadu ba teste.

Reportajen: Madalena Horta
Editor: Ekipa STL

LEAVE A REPLY

Please enter your comment!
Please enter your name here