Ema Barak Lakon Servisu

Pandemia COVID-19 afeita tebes iha mundu inklui Timor Leste. Halo ema barak moris susar, laiha osan tanba lakon servisu iha fatin neebe sira servisu ba. (Foto ilustrasaun: GSE)

DILI, STLNEWS.co – Pandemia COVID-19 afeita tebes iha mundu inklui Timor Leste. Halo ema barak moris susar, laiha osan tanba lakon servisu iha fatin neebe sira servisu ba.

Tuir Sidadania Ana Casimiro hatete, impaktu husi pandemia COVID-19 nee, halo ema barak mak lakon servisu no lakon ba sira nia moris hanesan fila liman. Situasaun nee halo ema neebe mak servisu iha kompania privadu sira, kompania nain tenke hasai ka hapara sira, tanba laiha osan atu selu. Nunee sira tenke hela iha uma, tanba laiha ona kampu traballu ba sira. Haree ba tinan kotuk, buat hotu sei lao diak, maske orsamentu iha rai laran la lao, maibe sei diak netik. Iha tinan ida nee, ho COVID-19, fo impaktu ba buat barak.

“Situasaun nee halo ami povu kiik sente susar tebes, tanba laiha osan neebe sufisiente atu sustenta nesesidade familia uma laran nian,” dehan nia ba STL iha Tuana Laran, Domingo (15/11/2020).

Nia hatutan, ba familia neebe mak fen ho Laen servisu hotu, nee sente ba diak. Maibe kuandu ema nain ida deit mak hanesan xefe familia senti triste tebes. Pior liutan kuandu servisu iha kompania ho situasaun hanesan nee kompania nain hamenus osan, balun hapara servisu tanba laiha osan atu selu.

Iha biban nee Ana sujere ba nai ulun sira, atu tau matan ba povu nasaun nee nian, iha situasaun COVID-19 nee.

Tanba Timor oan barak mak laiha servisu, balu fila liman hodi sustenta sira nia familia, maibe sira nia sasan la folin.

Iha sorin seluk, Vendedor Ai Oan, Maria Lauresi de Jesus dehan, COVID-19 nee halo ema barak laiha osan, hodi sosa ai oan neebe nia faan ba.

Tuir nia, ema laiha osan laos deit COVID-19, maibe impaktu mos husi orsamentu neebe durante nee la lao.
“Antes virus nee mosu, ema barak mai hola ai oan neebe hau faan. Maibe depois pandemia nee mosu, ema komesa menus too agora,” nia hatete.

Nia afirma liutan, agora nee fulan ida ema mai sosa dala rua ka tolu deit, la hanesan uluk. Kada semana ema sempre mai sosa.

Tuir Maria, dala ruma ema la mai sosa, laos tanba osan laiha. Sira iha duni osan, maibe sufisiente deit ba sira nia han ho hemu nian deit. Atu sosa fali sasan seluk hanesan ai oan la too.
Ai oan neebe nia fan mak hanesan sabraka oan, has no seluk tan ho folin neebe la hanesan.*

Reportajen: Domingas Gomes
Editor: Ekipa STL

LEAVE A REPLY

Please enter your comment!
Please enter your name here