Familia Matebian Rezeita, Francisca Mate Laos Tanba Covid

Familia husi matebian Francisca Gama rezeita ka konsidera sira nia bin ka kunhada (Francisca-red) mate laos, tanba Covid-19 maibe mate tanba moras seluk. Kestaun nee hatoo husi Familia matebian, Eugenia Ximenes dos Santos ba STL, liu husi telefone, Tersa (06/04/2021). (Foto: STL/Donaciano Magalhães)

DILI, STLNEWS.co – Familia husi matebian Francisca Gama rezeita ka konsidera sira nia bin ka kunhada (Francisca-red) mate laos, tanba Covid-19 maibe mate tanba moras seluk. Kestaun nee hatoo husi Familia matebian, Eugenia Ximenes dos Santos ba STL, liu husi telefone, Tersa (06/04/2021).

Nia dehan, bin ka kunhada mate nee laos tamba Covid-19 maibe mate tanba hasoru moras durante tinan haat nia laran. “Tuir ami familia nia hanoin nee laos mate tanba Covid-19 maibe bin mate nee moras kleur tiha ona no moras nee hahu 2017 too mai agora, halo nia isin fraku loos lori nia ba izolamentu mak ema dehan mate tanba Covid-19 ne,” hatete familia matebian nee.

Familia matebian nee hatutan, moras neebe durante nee mana sofre durante nee ma estomok, gagal ginjal, nomos moras seluk tan.

“Nia moras estomok, gagal ginjal, no tensaun, durante nia moras nee ami sempre lori hela deit ba halo tratamentu iha Hospital Nasional Guido Veladares, ba halo tiha tratamentu doutor sira dehan diak ona lori tiha mai too uma moras fali, ami lori fali ba deit hanesan nee hela deit,” hatete Eugenia.

Eugenia dehan, familia ezije atu lori mate isin mai uma maibe parte governu dehan labele no sira dehan corona mak halo bin ka kunhada nee mate.

“Ami nonok deit ona no ohin lori ba halot iha Metinaro mos ami familia la partisipa, maun ho oan deit mak akompana, ami familia barak atu ba maibe estadu la foo fatin mai ami,” katak Eugenia.

Iha parte ketak, Koordenador Pilar VII, Nilton do Carmo da Silva hatete, pasiente pozitivu feto idade 44, neebe halo detekta Covid-19 iha loron 24 fulan Marsu, no lori ba sala izolamentu Tasi-Tolu.

“Maibe pasiente Covid-19 mai nee ho kondisaun neebe grave, hanesan ita haree pasiente nia istoria tratamentu ba moras gagal ginjal kronik,” nia informa.

Entretantu matebian neebe mak deskonfia mate ba Covid-19 ho naran kompletu Francisca Gama, ho tinan 44, husi suku Saelari, Postu Administrativa Laga, Munisipiu Baucau. Durante nee matebian hela iha Bidau Massaur no ekipa husi saude identifika matebian pozitivu ba Covid-19, hodi ba halo izolamentu iha Tasi-Tolu iha loron 24 fulan Marsu tinan 2021.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here