Governu Laiha Seriedade Prevene Povu Husi Covid

Analizador Politika UNTL, Camilo Ximenes Almeida. (Foto: STL/Natalina Lopes)

DILI, STLNEWS.co – Governu laiha seriedade atu prevene povu husi Covid-19, tanba sira (Governu-red) rasik la kumpri medidas prevensaun neebe implementa.

Dehan analizador Politika UNTL, Camilo Ximenes Almeida ba STL, iha Kampus Caicoli, Segunda (18/01/2021).

“Dadaun nee iha nasaun estranjeiru moras Covid-19 kontinua hamate ema loro-loron, maibe ita iha Timor Leste, governu la iha seriedade atu prevene populasaun sira husi Covid-19, tanba regras neebe governu kria sira rasik la kumpri,” dehan Camilio.

Nia dehan, wainhira governu hakarak estende Estadu Emerjensia la presiza implementa hotu iha teritoriu Timor Leste, maibe implementa deit ba munisipiu tolu hanesan Suai, Maliana, no RAEOA.

Iha posibilidade iha Dili no munisipiu seluk Estadu Emerjensia nee lapresiza estende, maibe konsentra deit iha munisipiu 3 nee, tanba sira iha fronteira besik nasaun vizinu Indonezia.

“Hau mos rona dehan aviaun atu tama no estudante sira iha liur atu tama, sira tama loke portaun iha fronteira no ba iha Suai, tanba iha neeba iha ona kampu aviasaun nomos iha Oecusse ema dehan kampu aviasaun neebe kapas, koko tok tun iha neeba halo kuarentena durante loron 14 iha neeba, kuandu diak ona bele mai iha Dili, para transmisaun lokal labele iha,” dehan nia.*

Reportajen: Natalina Lopes
Editora: Carme Ximenes

LEAVE A REPLY

Please enter your comment!
Please enter your name here