Halo Estudu Antes Povu Simu Vasinasaun

Akademista iha rai laran husu ba governu atu halo estudu klean, antes povu simu vasinasaun. (Foto: Espesial)

DILI, STLNEWS.co – Akademista iha rai laran husu ba governu atu halo estudu klean, antes povu simu vasinasaun.

Tuir Dekanu UNTL Fakuldade Siensia Sosiais no Politiku, Camilo Ximenes hatete, hanoin katak governu tenki estudu klean kona ba vasinasaun nee no mos atu prepara mediku sira hodi tuun ba komunidade, hodi pasa revista ba moras balun neebe komunidade sira iha hela, atu nunee labele mosu problema depois de vasinasaun.

“Hau laos mediku, maibe hau fo ezemplu, tanba ema dehan se wainhira ema balun neebe maka moras ezemplu hanesan HIV ka kankru ou moras sira neebe maka kroniku, nia labele simu, se wainhira nia simu maka nia monu kedas, tanba nee ita tenke hatene antisipa, buat sira nee atu labele akontese,” dehan nia ba STL,iha nia knaar fatin, Caikoli, Dili, Kinta (04/02/2021).

Nia dehan, ho problema sira nee tenki kuidadu ida neebe maka presiza atu halo no ida neebe maka seidauk bele, tanba laos atu ba antisipa pandemia nee maka tenki obriga maibe bele karik koko gratuitamente ba sosiedade sira, ka uma kain, hodi foti dadus husi komunidade rasik hodi hare saude publika nee atu ema bele hatene, ida neebe bele simu vasina, no ida neebe labele simu vasina nee.

“Hau hanoin presiza tenki akompana i presiza governu tenke husu dadus husi ospital sira, hodi hare pasiente neebe baibain ba halao tratamentu, tanba nee presiza iha fulan ida rua ka tolu atu envolve mediku sira tama sai uma hodi halo pasa revista saude gratuitu neebe maka bele hatene katak ema nia moras no daya tahan tubuh nee bele ou labele, depois ida nee maka ita bele aplika see maka iha posibilidade atu bele simu vasinasaun nee, no ida neebe maka labele simu.” dehan nia.

Reportajen: Santina Castro
Editor: Ekipa STL

LEAVE A REPLY

Please enter your comment!
Please enter your name here