Impase-Corona Halo Ekonomia Monu

Impase politika ho Corona virus (Covid-19) neebe mosu, halo dezenvolvimentu ekonomia iha rai laran monu, tanba povu laiha osan hodi kompras. (Foto: STL/Carme Ximenes)

DILI, STLNEWS.co – Impase politika ho Corona virus (Covid-19) neebe mosu, halo dezenvolvimentu ekonomia iha rai laran monu, tanba povu laiha osan hodi kompras.

Kestaun nee hatoo husi, eis deputadu Bankada PD, iha Terseira Lejislatura, Virgilio Hornai ba STL, Iha Surikmas, Dili, Kinta (03/12/2020).

Nia dehan, impase politika no Covid-19 neebe mosu fo atrazu boot ba dezenvolvimentu tomak. Konsekuensia nee fo impaktu direita ba dezenvolvimentu pais no espesialmente kresementu ekonomia monu, hodi halo aumenta ba numeru dezempregu neebe sae no rendimentu populasaun tun.

“Ita haree povu barak moris iha inkondisional ekonomia, tanba la hetan osan atu kompras iha sira idak idak nia uma kain, kbiit kompras neebe menus halo ekonomia rai laran lao neneik no situasaun ida nee halo setor privadu mos hetan problema,” dehan eis deputadu nee.

Atu aselera dezenvolvimentu ekonomia iha rai laran Virgilio dehan, importante orsamentu anu fisikal tenke lao normal, nunee bele ezekuta tuir planu asaun neebe sita ona iha programa governu, maski governu ida nee parte ida husi kontinuasaun VII neebe hetan impase hodi lori kauza ba dezenvolvimentu pais nee rasik.

Nia hatutan governu mos tenke iha politika stimulus finanseriu hodi dinamiza ekonomia liu liu ba setor privadu ho tipu atividade negosiu kiik.
“Ita hotu hatene negosiante kiik sirabele nafatin survavel, tanba sira bele halo rasik sira nia negosiu katak la uja traballador barak,” dehan nia.

Entretantu relasaun ho apoiu doadores iha ambitu parseria ba situasaun agora tuir nia katak, lahanesan ona uluk molok Covid-19, tanba surtu Covid-19 halo pais sira neebe ekonomia potensial mos monu hodi halo sira mos infrenta situasaun ekonomia rai laran neebe mosu mos.

“Hau hanoin apoiu husi parseiru dezenvolvimentu sira sei la natoon, atu it abele uja hanesan modalidade hodi hadia ita nia ekonomia rai laran no dezenvolvimentu enjeral,” Virgilio afirma.

Virgilio dehan, iha prespetiva 3 hodi kontribui kresementu ekonomia pais hanesan, osan tenke sufisiente hodi sirkula iha pais, investimentu esterna neebe presiza tebes hodi absorbe traballador neebe iha godi bele fo rendimentu ba populasaun, atu nunee ema bele iha kbiit kompras no governu nia investu publiku hodi dudu kresementu ekonomia no dezenvolvimentu nasional.*

Reportajen: Carme Ximenes
Editora: Carme Ximenes

LEAVE A REPLY

Please enter your comment!
Please enter your name here