Implementa Teste Swab Ba Populasaun Tenke Tuir OMS & MS

DILI, STLNEWS.co – Bainhira implementasaun teste swab ba populasaun hotu iha Timor Leste, tenke bazeia tuir regras Organizasaun Mundial Saude (OMS) no bazeia ba diploma Ministeriu Saude (MS) nunee bele regulariza implementasaun no mata dalan swab Covid-19.

“Hau bazeia deit asesu ba literatura publikasaun balun neebe iha, kona ba implementasaun swab ba populasaun hotu iha Timor Leste, tenke bazeia ba regras Organizasaun Saude Mundial, no bazeia ba Diploma Ministrial da Saude, ka husi Sentru Integradu Jestaun Krize (CIGC), nunee bele regulariza implementasaun ho mata dalan swab Covid-19 nian,” lia hirak nee hatoo husi Dekanu Fakuldade Saude Publika Universidade da Paz (UNPAZ), Martinus Nahak ba STL, liu husi telefone, Tersa (18/05/2021).

Nia informa, tuir referensia balu neebe ita asesu katak atu haree ba kazu Covid- 19 maka liu husi alternativu rua, primeiru maka halo teste rapidu, liu husi teste ran pasiente sira nian, no segundu maka halo teste swab ba pasiente Sira. Fatin halao teste rapidu no swab, sei halao iha sentru saude no Hospital.

Kona ba teste swab, molok halao pesoal saude tenke halo interviu epudemiolojia ba pasiente refere, kona ba durante nee nia halao vizita ba zona sira neebe infetadu ona ho Covid- 19, nia iha kontaktu ruma ho ema sira neebe moras Covid-19, nia sente iha sintomas Covid-19 ruma, no nia tuir seremonia neebe halibur ema barak.

Depois maka pesoal saude tetu hodi deside presiza halo teste swab ka lae. Maibe pasiente tenke justu, onestidade ka lasubar lia bosok. Husi kontekstu nee ita bele sumariza lalais katak swab halao iha fatin tratamentu iha saude no liu hosi analiza ba informasaun epidemiolojia pasiente ninian.

“Maibe fatin bele muda tuir ita nia situasaun no kondisaun neebe tuir rekomendasaun husi Sentru Integradu Jestaun Krize (SIJK) karik bele, maibe rekezitus rekursu humanu no ekipamentu neebe kualidade hodi halao servisu ida nee ho diak. Kona ba swab ba populasaun Timor laran tomak nia objetivu maka oinsa identifika ema individu ida iha ka lae virus covid neebe bele halo transmisaun ba ema seluk,” katak nia.

Nunee mos observador politika Universidade Nasional Timor Lorosae (UNTL) Felisberto de Carvalho dehan, bainhira halo teste swab governu tenke halo mapamentu ba area risku neebe maka iha ona transmisaun lokal, hodi nunee komunidade sira iha area refere obrigatoriumente tenki tuir swab.

“Governu dehan obrigatoriumente tenke tuir swab maibe tenke sosializa lai komunidade sira no fo esplikasaun ba ita nia komunidade para sira mos hatene objetivu saida maka husi swab nee,” katak nia.*

Reportajen: Natalina Lopes
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

URA Feto Sempre Apoiu Mane

DILI, STLNEWS.co – Tempu difisil feto sempre apoiu mane iha luta ba Ukun Rasik An (URA), ikus hetan independensia, kontribuisaun konta hotu feto ho...

Loron Ba Loron Jose Nia Rendimentu Menus

DILI, STLNEWS.co – Negosiante Jose Nascimento Nunes, neebe faan ropa obralan iha area Bairru Pite, sente triste ho situasaun pandemia Covid- 19 nee, tanba...

Kandidatu An PR, Tenke Hatene Linguistika

DILI, STLNEWS.co – Jurista Timoroan Sergio Dias Quintas dehan, individu neebe hakarak kandidatu ba Prezidente Republika (PR), tenke hatene linguistika no labele sai opozisaun. "Primeiru,...
%d bloggers like this: