Indonezia Covid-19 Sae Makas, Governu Orienta UPF Aperta Seguransa

Kazu positivu Covid-19 foun iha nasaun vizinu Indonezia liu liu besik lina fronteira terestre neebe kontinua sae, nunee governu husu ba Unidade Polisia Fronteira (UPF), tenke aperta seguransa ba fronteira para bele prevene movimentu ilegal sira. (Foto: Serviços Relações Públicas)

DILI, STLNEWS.co – Kazu positivu Covid-19 foun iha nasaun vizinu Indonezia liu liu besik lina fronteira terestre neebe kontinua sae, nunee governu husu ba Unidade Polisia Fronteira (UPF), tenke aperta seguransa ba fronteira para bele prevene movimentu ilegal sira.

Tuir Vise Ministru Interior (VMI) Antonio Armindo katak, enkontru ho Ministru Interior atual Primeiru Ministru Taur Matan Ruak, hodi informa kona ba serbisu liu liu planu oinsa atu reforsa seguransa iha lina fronteira terestre no Tasi.

“Ohin hau informa ba Primeiru Ministru katak ba oin presiza oinsa atu asegura ita nia fronteira, tanba dadaun nee kazu Covid-19 foun sae makas tebes iha nasaun vizinu liu liu Indonezia,” dehan VMI, Antonio ba jornalista, hafoin remata enkontru ho Primeiru Ministru, Taur Matan Ruak, iha Palasiu Governu, Dili, Sesta (15/01/2021).

Nia dehan, governu preokupa tebes ho situasaun seguransa iha lina fronteira, nunee kolia ona ho komisariu PNTL hodi orienta komandante Unidade Polisia Fronteira (UPF), kontrola ba lina fronteira liu liu ba fatin sira neebe idenfika ona ema halo movimentu ilegal.

“Ita kolia ona ho Komisariu PNTL, no Komisariu rasik mos kolia ho komandante UPF, nomos komandante munisipiu sira nunee bele serbisu hamutuk para asegura lina fronteira, liu liu ba fatin neebe Ita identifika ona sai fatin ba movimentu ilegal, para koloka tan membru balun hodi asegura ema labele tama sai ilegal iha lina fronteira sira,” nia esplika.

Nia haktuir, governu Timor Leste tenki tau seriedade ba kestaun seguransa iha lina fronteira terestre, tanba wainhira ema halo movimentu ilegal bele lori moras Covid-19 mai TL.

“Ita hatene ema kuandu halo movimentu ilegal makas iha lina fronteira bele risku mai ita hotu, tanba nee husu sidadaun sira hotu tenki iha konsiensia labele halo movimentu ilegal iha lina fronteira,” nia esplika.*

Reportajen: Alberto Menezes
Editora: Carme Ximenes

LEAVE A REPLY

Please enter your comment!
Please enter your name here