Izolamentu Sai Fatin Diskoteka No Joga, Nilton: Pasiente Presiza Deskansa

DILI, STLNEWS.co – Fatin izolamentu eternite Fatuhada neebe mak halo izolamentu ba pasiente Covid-19 la kontroladu, tanba nee pasiente balun uza fatin nee hodi kanta no toka iha laran hodi halo pasiente seluk neebe presiza deskansa la diak.

Kestaun nee hato’o husi pasiente Covid-19 inisial CS ba STL liu husi telefone, Sabadu (28/08/2021) hatete, durante sira tama iha izolamentu defikuldade neebe mak sira hasoru mak fatin nee la kontrola husi ministeriu neebe relevante, hodi nunee halo ema neebe mak iha izolamentu laran laos ba halo tratamentu, maibe ba kanta no toka fali iha laran, no halo sira labele deskansa.

“Sentimentu bainhira hela iha kuarentena, defikuldade neebe ami hasoru mak fatin toba tanba pasiente sira mai toba butuk hamutuk. Loron ba loron ema barullu, halo ami ladun deskansa,” dehan nia.

Nia hatete, koalia konaba hijene iha ka lae tuir nia sente ladun hijene, tanba hariis fatin ladun mos, no mos pasiente mane sira fuma sigaru soe arbiru iha izolamentu laran.

Tuir nia haree fasilidade hanesan kama, kulsaun, esponza balun diak no balun la diak ona, maibe kada loron pasiente balun sai, balun tama toba troka malu deit iha laran.

“Hahan loron – loron iha fatin izolamentu nee kada loron ida han dala tolu, dader, meudia no kalan. Dadersan matabisu han donat ida ho indomilk ida, meudia han etu ho modo naan fahi, troka ayam potong no seluk tan, kalan mos hanesan,” katak nia.

Nia hatutan, nia sente nia an rasik kondisaun diak hela hanesan babain laiha reasaun ruma.

Iha fatin hanesan pasiente inisial JM hatutan, nia sente la aguenta ho izolamentu eternite, tanba laiha kontrola husi ministeriu relevante sira. Pasiente sira kanta toka halo nia labele deskansa.

“Hau la aguenta iha fatin ida nee, tanba iha defikuldade ba ami mak fatin ami atu deskansa mak susar loos, tanba ami kuaze hamutuk nain lima nulu (50) mak akumula hamutuk iha sala ida, nunee mos entre ami sira nee mos laiha distansiamentu ba malu, tanba sala laran nee nakonu (full),” dehan nia.

Nia hatutan, loron kalan mak pasiente sira nee halo barullu, balun joga karta, balun bingo, no balun karaoke no dahur, neebe halo pasiente seluk atu deskansa oituan susar los.

“Konaba hijene ami nee toba hamutuk deit ho foer (sampah) ka han restu neebe mak balun han la hotu, aqua mamuk, plastiku sira konta ami soe deit iha ami nia fatin, no aat liu mak pasiente balun fuma sigaru iha laran no sigaru suar sira nee halo ami sira neebe la fuma nee dada iis araska los,” katak nia.

Konaba fasilidade hanesan kama, kulsaun nee pasiente idak – idak ba hetan nain lori mai nahe hodi toba, nein pesoal balun iha para prepara fatin ba pasiente sira.

Nia hatutan, nia tama iha Kinta no kondisaun diak hela, la sente moras ruma atu mear ka inus metin no seluk tan mos laiha.

Hatan ba kestaun nee Koordenador Pilar 7 husi Sentru Integradu Jestaun Krize (SIJK), Doutor Nilton do Carmo da Silva husu pasiente sira ho konsiensia atu kumpre regra para rekupera lalais.

Koordenador Pilar 7 nee hatete, mediku sira iha izolamentu sempre fo informasaun hela deit ba pasiente sira oinsa atu hakmatek, maibe pasiente sira mak laiha konsensia.

“Mensajen mak nee, pasiente ba izolamentu nee, ema neebe mak sintomas nee presiza duni deskansa, tanba nee mak karik balu sente diak hakmatek nunee ema seluk bele deskansa, tanba ho deskansa mak bele rekupera lalais,” katak nia.

Doutor nee katak, haree ba kazu neebe mak makaas entaun haree uluk mak sira neebe sintomas, maibe se sira neebe mak asintomatiku kuandu sente diak ona bele kontaktu hela mediku para haree mos sira nia kondisaun.

“Hotel eternite nee akumula ema barak duni, tanba nee mak susar kontrola, tanba ema barak los maibe ami nia papel mak nee, ami sempre fo hanoin ba maluk sira katak sira mai nee mai ho moras, tanba nee mak presiza duni konsiensia katak ema seluk presiza deskansa, tanba nee labele halo movimentu ba mai no labele hakilar tun sae, nee ami sempre fo hanoin, tanba dala barak ema barak entaun susar kontrola,” katak nia.

Nia hatutan, laos deskontrola tanba mediku sira sempre ba iha neeba maibe barullu, nee tanba akumula ema barak, tanba nee konsekuensia mak hanesan nee ona, tanba ema iha liur mos hakarak ba maibe fatin laiha.

Nia akresenta liu tan, husu konsiensia pasiente sira atu kolabora ho parte saude, atu nunee fo toleransia mos ba ema seluk atu deskansa.*

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: