Kazu Transmisaun Lokal Hamutuk Nain Neen

Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste (TL), Rui Maria de Araújo. (Foto: STL/Donaciano Magalhães)

DILI, STLNEWS.co – Ohin 24 Fevereiru 2021, kazu konfirmadu Covid-19 positivu aumenta tan nain 2, nafatin husi Aldeia Klauhalek, Suku Belulik Leten, Postu Administrativu Fatumean, Munisipiu Covalima, tanba nee kazu transmisaun lokal hamutuk nain 6.

Hatete Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste (TL), Rui Maria de Araújo ba jornalista sira liu husi konfrensia imprensa iha Fatin CCD sala de situasaun CIGC, Kuarta lokraik (24/02/2021).

“Ita rezistu tan kazu konfirmadu foun 2, neebe positivu ba Covid-19 nafatin husi Aldeia Klauhalek, Suku Belulik Leten, Postu Administrativu Fatumean, Munisipiu Covalima. Sira nian 2 membru familia husi kazu foun neebe anunsia iha ona horiseik nain 4 nee,” hatete Rui.

Nia dehan, ekipa ambulansia ohin meiu-dia, too iha Fatumea, no evakua kedas kazu konfirmadu foun nain rua nee mai hamutuk ho nain 6 hodi tama izolamentu iha Vera Cruz, Dili.

Nia informa, husi sira nain 6, balun asintomatiku, i balun mos sintoma infesaun respiratoriu agudu, maibe sira hotu iha kondisaun estavel. Orsida kalan sira too iha Vera Cruz.

Nia mos esplika, iha ekipa vijilansia epidemiolojika ho ekipa laboratoriu, ohin hamutuk ho ekipa sentru nian ho Saude Fatumean ninia, nafatin halao rastreiu ka foti amostra husi ema neebe iha kontaktu.

No mos besik ho sira neebe konfirmadu positivu ona, no mos husi vizinu sira, tanba kazu konfirmadu foun nee horiseik too ohin, iha Fatumea, nafatin hatudu katak “Iha ona transmisaun lokal husi possivelmente kazu importadu klandestinamente’’ nia dehan.

Tanba husi populasaun neebe tama sai fronteira, maibe sei restritu iha cluster ka agrupamentu ida, iha suku Belulik leten. “Hau atu dehan deit diferensa entre transmisaun lokal ho transmisaun komunitaria, transmisaun lokal signifika ita iha kazu importadu ruma neebe hadaet ona moras nee, ba ema nee hela iha rain-laran, nomos la halo viajen transmisaun komunitária signifika, ema neebe positivu, la iha istoria viajen, no laiha istoria kontaktu ho ema ruma neebe halo viajen,” nia informa.

Liu husi oportunidade nee mos nia fo hanoin, haree husi nivel alerta no resposta neebe Governu Timor-Leste adopta ba prevensaun no mitigasaun Covid-19 iha Timor-Leste, hahu 23 de Fevereiru 2021. Nia tenik, Timor-Leste (TL) tama fali ba faze neebe hanaran ALERTA 3, ka faze ‘’mitigasaun’’. ALERTA 3 nee aplika ba Timor-Leste tomak, maibe Serka Sanitaria aplika deit ba munisipiu Covalima no Bobonaro, tuir rezolusaun governu nº4 & nº5, 15 Fevereiru 2021. Ema ka sasan atu tama sai ba munisipiu rua nee, tenki iha autorizasaun husi Sala Situasaun, Centro Integrado Gestão de Crises.

Nia apela mos ba populasaun iha Fatumea atu labele paniku. Favor tuur hakmatek iha ida-idak nia fatin, lalika lao ba mai lai.

“Fo tempu atu ita nia ekipa saude ho ekipa konjunta husi Sala Situasaun, buka tuir kontaktu, no foti tan amostra hodi bele halo test,” nia argumenta.

Nunee mos populasaun iha munisipiu Covalima no Bobonaro, liu-liu sira neebe hela besik kedas lina fronteira atu labele hakat ba mai iha fronteira.

“Tanba iha ita nia vizinu akontese ona no akontese dadaun hela transmisaun komunitaria, tanba nee husu ba ita nia komunidade ho lider komunitariu sira, wainhira hatene karik ema ruma, neebe halo viajen atravesa fronteira ba nasaun seluk, no fila mai la aprezenta an atu tama kuarentena, favor informa autoridade polisia ho pessoal saude nian, atu bele lori, ema nee ba kuarentena,” nia hatutan.

Nia afirma, ba mos populasaun iha Timor-Leste laran tomak, “Husi evidensia neebe ita iha, maske transmisaun lokal nee sei restritu iha Suku Belulik Leten, Fatumeta, ita hotu tenki alerta nafatin, no alerta ba bei-beik, hodi pratika ho disiplina utilizasaun maskara, medidas ijiene pessoal, distansiamentu fiziku, no evita halibur malu barak.

Entertantu total ema iha kuarentena sae ba 289 (horiseik 190). Ema tama ohin husi Aeroportu International Nicolau Lobato hamutuk 54 pessoas, 15 fila husi Bayu Undang, 39 mai husi Australia.

Dadus Jeral neebe MS fo sai kazu konfirmadu foun 2, no kazu rekuperadu 6, kazu ativu oras nee 21 pesoas.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here