DILI, STLNEWS.co – Governu implementa Konfinamentu Obrigatoriu (KO) iha Munisipiu Dili, Komunidade Suku Bidau Lecidere, Postu Administrativu Vera Cruz, kumpre regras neebe Ministeriu Saude (MS), liu husi Organizasaun Mundial Saude (OMS) fo sai.
Xefe Suku Bidau Lecidere Luis Rebelo Soares Pereira hatete, maske ema hotu la hatene moras Delta mosu husi neebe, maibe rona husi media fo sai katak, moras nee iha duni, neebe estadu implementa KO atu prevene an, para labele hetan moras ida neebe espalla iha nasaun seluk.
Nia dehan, estadu iha poder hakarak nia povu mos moris ho saudavel tenke aplika duni, maibe fila fali ba ita mos tenke kumpre mak diak, sei ita lakoi kumpre estadu liu husi WHO sira aplika, ita mak estraga vida rasik.
“Iha hau nia suku rasik nee momentu tinan kotuk ba akontese Covid 19, iha suku refere, kumpre regras sira neebe fo sai, maske iha tempu neebe Covid-19 makaas, maibe sira kumpre nafatin to’o agora,” dehan Luis Rebelo ba STL iha knaar fatin Bidau Lecidere, Sesta (27/08/2021).
Nia akresenta, KO fo impaktu ba komunidade sira, maibe impaktu ba negosiante kiik sei diak, duke ita lakoi halo tuir, mak ita hetan moras nee mate mos sente ladun diak.
“Ita ema moris laos tauk mate, maibe ho moras ida neebe tama ona, diak liu prevene ita nia an, ita kumpre regras neebe governu aplika,” tenik nia.*
Reportajen: Blandina Mauno/Joaninha Belo
Editor: Ekipa STL
