Komunidade Kontinua Halibur Malu La Uza Maskara, Antonio: Kazu Infesaun Aumenta Maka’as

DILI, STLNEWS.co – Sekretariu Jeral Autoridade Munisipio Dili, Antonio Moniz Klau dehan, dadaun nee komunidade kontinua halibur malu barak no la uza maskara, maibe agora dadaun kazu infesaun aumenta maka’as.

Nia hatete, numeru kazu infesaun foun aumenta maka’as, bainhira governu deside hakotu desizaun politika konfinamentu obrigatoriu no re-ativa movimentu sira hanesan transporte publiku, eskola, ida nee fo impaktu maka’as. Sira iha ekipa task force ba Covid-19, neebe involve ekipa saúde, seguransa, lider komunitaria sira atu halo sensibilizasaun ba komunidade sira no kontrolu implementasaun medida prevensaun sira, maibe asaun hotu tenke bazea ba baze legal atu komunidade sira mos fiar no kumpre.

“Fila fali ba konsensia ema ida – ida nian, agora servisu hotu ita halo ona atu enkoraja ema hotu proteje ida – ida nia an, maibe realidade ita haree kuaze ema halibur malu iha fatin barak la uza maskara tanba nee kazu infesaun aumenta maka’as iha Dili,” dehan Antonio ba jornalista sira, iha nia knaar fatin, Kuarta (25/08/2021).

Nia hatutan, ekipa nafatin halo sensibilizasaun ba fatin sira neebe movimentu maka’as hanesan merkadu, no enkoraja ema hotu atu simu vasina. Total komunidade elejivel simu vasina iha Munisipiu Dili hamutuk 213,000 resin. No husi numeru nee ema nain 151,605 mak simu ona vasina doze dahuluk no daruak, maibe nain 62,000 resin mak seidauk, tanba nee nafatin halo esforsu atu kobre ema hotu.

Iha fatin ketak, komunidade Suku Comoro, Juvito de Jesus esplika, komunidade laiha konsensus atu halo prevensaun ba Covid-19 nee, tanba nee iha eventu hanesan foin dadaun pameran iha Comoro ema barak tebes mak la uza maskara, tanba sira hanoin Covid-19 bosok no Covid-19 politiza deit.

Tanba nee husu ba governu liu husi Ministeriu Saude, tenke tun ba baze hodi halo sosializasaun ba komunidade sira, atu nunee sira bele iha konesimentu neebe diak ba sira nian an no ba sira nia familia, tanba dala barak sira la fiar Covid-19 iha, tanba sira menus informasaun.*

Reportajen: Jeniche da Costa

Editora: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: