Mantein Traballador Iha Situasaun Covid-19

Durante iha situasaun Covid-19 traballador sira servisu nafatin, tanba nain ba kompania mantein nafatin hodi halao atividade servisu. (Foto Ilustrasaun: GSE)

DILI, STLNEWS.co – Durante iha situasaun Covid-19 traballador sira servisu nafatin, tanba nain ba kompania mantein nafatin hodi halao atividade servisu.

Rosalino Martins Nunes, hanesan nain ba kompania Romanu unip.Lda, husi Munisipiu Baucau hatete, iha Covid-19 nian laran, sira mantein nafatin traballador hirak neebe servisu iha sira nian loja no restorante, maski TL hasoru dezafiu iha situasaun pandemia ida nee, maibe ninia traballador sira kontinua halao servisu hanesan bai-bain.

“Hau hanoin, maski ita hasoru dezafiu boot ba iha situasaun Covid-19, maibe hau nian traballador nain 4 servisu iha hau nian loja no nain 3 seluk servisu iha hau nian restorante, iha Covid-19 hau mantein nafatin sira kontinua halao servisu hanesan bai-bain. Dala ruma sasan loja nian hotu, hau mai sosa iha armajen, depois hau lori ba faan fali iha Munisipiu, kona ba rendimentu uluk nee menus, agora lao hahu diak,” dehan Rosalino ba STL, iha armajen Perissos, Fatuhada, Dili Tersa (22/12/2020).

Rosalino hatutan iha aplikasaun EE primeiru, nee kada loron sira ladun hetan rendimentu, maibe dadaun nee rendimentu kada loron hahu diak dadaun ona, tanba konsumedor sira barak hahu sosa sasan nesesidade baziku iha munisipiu.*

Reportajen: Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here