MdS-PNTL Halao Sensibilizaun

Ekipa task force Prevesaun Covid-19 hamutuk ho Polisia Nasional Timor-Leste (PNTL) neebe apoiu husi Ministeriu Saude halao sensibilizasaun ba iha Loja no Merkadu sira iha Dili laran, atu nunee bele prevene pandemia Covid-19. (Foto: Palácio das Cinzas)

DILI, STLNEWS.co – Ekipa task force Prevesaun Covid-19 hamutuk ho Polisia Nasional Timor-Leste (PNTL) neebe apoiu husi Ministeriu Saude halao sensibilizasaun ba iha Loja no Merkadu sira iha Dili laran, atu nunee bele prevene pandemia Covid-19.

Diretora Servisu Saude Munisipio Dili (SSMD) Agustinha Segurado hatete, ema barak halo muvimentu iha Munisipiu Dili, liu iha loja no Merkadu, tanba nee Prezidente Autoridade Munisipiu Dili nian hamutuk ekipa task force Prevensaun Covid-19 nian ho Polisia Nasional Timor-Leste (PNTL) no apoiu masimu husu Ministeriu da Saude (MdS) hodi halao sensibilizasaun iha fatin Publiku no mos ba loja sira iha kapital Dili.

“Ita hotu hatene katak, agora dadaun ita persiza haree kriteria neebe maka rekomenda husi OMS atu ema hotu-hotu tenke implementa fase lima bei-beik ho sabaun no moz tenke uza maskara molok tama ba loja laran ka lao ba fatin seluk, atu nunee prevene moras Covid-19,” dehan Agustinha ba jornalista sira, iha Kolmera Dili, Kinta (07/01/2021).

Nia haktuir, sensibilizaun nee sira halao uluk ona iha loja sira, tanba movimentu iha loja nee barak liu, entaun persiza haree liu ba material sira neebe maka loja nain perepa, atu bele prevene virus corona, mak hanesan bee no sabaun tau iha loja oin, no ema vizitante no faan sasan mos tenke uza maskara, depois sira mos halo distansiamentu sosial.

“Tanba nee mak sira fahe ekipa sensibilizaun nee ba tolu, atu bele haree iha loja sira nee, atu nunee ema hotu-hotu tenke kontribui, hodi prevene Covid-19. Maske ita kazu Covid-19 ho numeru neebe kiik, maibe laos ida nee mak sai kestaun, maibe ita presiza prevene ita nia aan, ba moras Covid-19 nomos moras sira seluk, tanba agora tempu udan,” haktuir nia.

Governante nee mos informa, fase lima bei-beik ho sabaun maka dalan diak liu atu prevene Covid-19, atu nunee bele redus numeru neebe agora dadauk iha.

“Ita prevene antes duke ita hetan tranmisaun husi kazu lokal, tanba agora Ita hatene katak kazu nee importa deit, tanba nee ami halo sensibilizaun Ida nee para ema hotu-hotu tenke halo prevensaun nee,” esplika nia.

Nia esplika, objetivu halo sensibilizaun ida nee ba rezulusaun Dekreitu Lei Estadu Emerjensia (EE) nian 21/2020, tanba nee iha tinan 2020 nee SSMD halao ona sensibilizaun uluk ona, maibe asaun ida nee foin mak intergadu ho Autoridade Munisipiu Dili, PNTL hamutuk ho MdS hodi halao sensibilizaun ida nee.

“Ami halo asaun nee lor-loron, no avizu lor-loron, tama sai Aldeia no loja sira, maibe ita haree iha ema balun susar teb-tebes atu kumpri, entaun inisiativu husi Presidente Autoridade Munisipiu Dili nian, hamutuk komandu PNTL Munisipiu Dili nian no apoiu masimu husi MdS para ita bele sensibiliza diak liu tan,” afirma nia.

Entertantu Prezidente Autoridade Munisipiu Dili (PAMD) Gaspar de Soares dehan, ohin nee halao sensibilizaun ba publiku nomos ba loja sira iha Kapital Dili, relasaun ho pendemia Covid-19, tanba iha loron kotuk liu ba nee, ekipa taskforce prevensaun Covid-19 nian reativa fali ona.

“Ita ba halo sensibilizaun ba publiku no liu-liu ba loja sira neebe la kumpri regras hanesan la tau bee ho sabaun iha loja oin, no ita kontinua husu ba ema sira neebe tama ba kompras no ema sira hein loja tenke fase lima no uza masker,” dehan nia.

Nia dehan, sensibilizasaun nee mos tenke lao tuir Dekreitu Lei Nu. 21/2020, tanba, se deit mak la respeita lei nee sei konsekuensia legal mak sei hasoru sira, tanba Covid-19 neebe agora TL infrenta.

Nia informa, komunidade sira neebe la respeita protokolu neebe mak saude fo sai ona nee tenke kumpri, sei la kompri sansaun mak tenke ba legal.

Nunee mos, Segundu Komandante PNTL Munisipiu Dili, Superintedente Euclides Belo dehan, Polisia Nasional Timor-Leste (PNTL) sei fo apoiu ba ekipa taskforce prevensaun Covid-19 husi Munisipiu Dili nian nomos Ministeriu da Saude (MdS) neebe halo sensibilizaun ba publiku atu halo prevesaun ba Covid-19.

“Tanba nee PNTL ami fahe ba ekipa tolu mos, fo apoiu ba prosesu sensibilizaun ba fatin sira nebee mak ita determina tiha ona, ekipa primeiru sei lao too iha Audian, Becora too fali Merkadu Taibessi, ekipa segundu ba Colmera, Dom Alexo, no ekipa terseiru sei ba Cristo Rei nian no seluk tan,” nia esplika.

“Hau espera katak komunidade barak mak hetan ona informasaun, entaun sira bele kumpri, sei la kumpri sei iha medusa para bele foti, maibe agora dadaun nee ita husu ba komunidade sira hakarak ka lakohi tenke kumpri,” tenik nia.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here