Numeru Rekuperasaun Covid-19 Makas, Governu Deside Normaliza Atividade Igreja No Kultural

Ministru Prezidensia Konsellu Ministru (MPKM), Fidelis Leite Magalhães. (Foto: Twitter @leitemagalhae)

DILI, STLNEWS.co – Relasiona ho numeru rekuperasaun kazu Covid-19, neebe makas liu kompara ho kazu pozitivu Covid-19 foun, tanba nee ohin governu liu husi reuniuan Konsellu Ministru extraordinariu aprova ona hodi renova Dekretu Governu nu. 21/2020 loron 30 fulan Dezembru hodi deside normaliza fila fali atividade relijioja no kultural.

Dekretu governu nian aprezenta husi Primeiru-Ministru, Taur Matan Ruak, kona ba medida sira ezekusaun deklarasaun Estadu Emerjensia (EE), neebe efetua husi Dekretu Prezidente Republika nu. 73/2020, loron 30 fulan-dezembru.

Medida sira neebe mak hatuur iha diploma nee mak hanesan ho Dekretu Governu nu, 18/2020, Ioron 3 fulan-Dezembru, neebe define ona regra sira ba ezekusaun husi deklarasaun ida uluk Estadu Emerjensia.

Tuir Ministru Prezidensia Konsellu Ministru (MPKM) Fidelis Leite Magalhães katak, projetu dekretu governu foun nia iha medida implementasaun Estadu Emerjensia hanesan iha loron 30 fulan liu ba Konsellu Ministru aprova neebe tama iha Vigor loron 2 fulan Janeiru too Fevereiru.

Tanba nee nia dehan, depois loron sanulu resin lima (15) hafoin deteta moras foun iha 24 fulan Dezembru, governu iha konkluzaun sientifikamente katak numeru rekuperasaun boot liu duke numeru moras foun neebe to agora seidauk iha transmisaun komunitaria ou transmisaun lokal. Ho ida nee mak konklui katak, halo deside hodi halo mamar fali medida implementasaun Estadu emerjensia.

“Ho dekretu lei neebe governu foin aprova nee, wainhira tama iha vigor hafoin publikasaun hanesan too aban mak sei muda implementasaun regra sira hanesan atividade relijioja no kultural bele normaliza fila fali,” dehan Ministru Fidelis, hafoin remata enkontru Konsellu Ministru iha Palasiu Governu, Sesta (15/01/2021).

Maibe nia husu ba komunidade sira wainhira partisipa iha atividade sira hanesan relijioja ka kultural, tenki iha konsiensia implementa medida sira hanesan distansiamentu sosial, uza maskara, nomos fase liman.

Reportajen: Alberto Menezes

Editor: Ekipa STL

LEAVE A REPLY

Please enter your comment!
Please enter your name here