Pasiente Covid-19, Haan Toba Hanesan Fahi Makau

(Foto Ilustrasaun: Espesial)

DILI, STLNEWS.co – Pasiente Covid-19 neebe iha izolamentu lokal Tasi-Tolu lamenta ho parte saude, tanba durante nee sira nunka simu aimoruk Covid-19, maibe ba haan hemu no toba deit hanesan fahi Makau.

Tuir pasiente Covid-19 konfirmadu hatete, sira sente triste no lamenta ho ekipa saude neebe lori sira ba iha izolamentu lokal Tasi-Tolu, maibe too agora seidauk simu aimoruk ruma konaba Covid-19 maibe ba haan toba deit, too agora mos sira sente saude diak hela.

“Aimoruk Covid-19 laiha, ami nian mak han hemu toba, koko tensaun no sira mos hatete katak, bainhira ami la mai koko ita boot sira nia tensaun bele koko mesak, sira fo nomor whatsapp depois haruka ami manda ba deit,” hatete pasiente konfirmadu nee ba STL via telefone, Segunda (22/03/2021).

Pasiente konfirmadu Covid-19 nee mos konta nia esperensia katak, momentu tama izolamentu lokal Tasi-Tolu, primeiru parte saude foti ninia subrinha ida katak pozitivu, nunee iha kalan parte mediku sira dere nia no tanba tauk populasaun sira paniku entaun haruka nia lao deit husi uma mak sae ambulansia, depois teste swab lokraik rona rezultadu katak pozitivu, maibe ba iha izolamentu lokal Tasi-Tolu too agora nunka hemu aimoruk no nia sente diak normal hela.

Nia dehan, iha izolamentu lokal Tasi-Tolu sira lao livre hela ba vizita malu tun sae deit no iha kuartu ida, iha nain 8 mak hamutuk no kama 8 rabat malu hanesan iha ospital.

Nia mos sente lamenta tanba durante nee sira la sente moras ruma, maibe parte saude ba sulan sira iha izolamentu lokal Tasi-Tolu hanesan fahi.

“Hau mai iha kuarentena loron 11 ona, durante hau mai sente la kontente ho parte saude neebe mak lori ami mai tiha fatin ida nee, mai sira husik hela deit ami hanesan los fahi Makau, fo haan dader, meudia, kalan no lokraik sira mai koko tensi, no laiha ekipa saude ida mai atu halo atendementu ba moras Covid-19, hanesan hau nia kolega balun hatete tiha ona katak apakah moras Covid-19 mak mai haan toba no koko tensi deit nee ka oinsa?” katak nia.

Nunee mos pasiente Covid-19 ho inisial M hatutan, durante nee nia hela iha Dili, antes tama iha serka sanitaria nia iha ona foho, maibe ikus parte saude avizu katak, sira neebe mak fila husi Dili tenke swab, nia mos kumpre no swab. Hotu, nia sei lao ba mai, ikus ekipa saude ba foti deit iha uma katak nia pozitivu, entaun lori sira mai izolamentu lokal iha Tasi-Tolu, maibe nia sente an diak hela.

“Hau lao babain hela nunka iha sintomas ruma, maibe ikus ekipa too uma dehan katak hau pozitivu ba Covid-19, maibe agora hau diak hela haan hemu lao ba mai diak hela hanesan babain,” katak nia.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here