PNTL-Instituisaun Governu no Parseiru Internsional, Fahe Informasaun Prevene Covid-19

Polisia Nasional Timor Leste (PNTL), entre instituisaun governu nian, no parseirus Internasional fahe opiniaun ba autoridade siguransa iha postu integradu sira oinsa bele prevene covid-19 iha area Fronteira. (Photo: STL News/Natalina Lopes)

DILI, STLNEWS.co – Polisi Nasional Timor Leste (PNTL), servisu hamutuk ho instituisaun governu ho parseirus internasional fahe opiniaun ba autoridade seguransa iha postu integradu sira oinsa bele prevene Covid-19 iha areia fronteira.

“Seremonia ida ohin nee ho ninia objetivu maka oinsa habelar servisu integrasaun liu-liu ba autoridade siguransa, iha postu integradu area fronteira nian, neebe koopera hamutuk ho parseiru internasional sira oinsa atu bele prevene Covid-19 iha nasaun nee ho diak liutan,” lia hirak nee hatoo husi Komandante Jeral PNTL Superintendente Xefe Polisia Faustino da Costa ba jornalista sira iha Salaun Sentru Formasaun Polisia (CFP) Comoro, Kuarta (26/08/2020).

Nia dehan, atu halo prevensaun iha area fronteira nian, primeiru maka autoridade tenki hatene oinsa para bele konvensa komunidade sira, ita nia komunidade sira iha fronteira dehan sira nia moris mak ilega nee, entaun oinsa maka ita bele konvensa ema sira nee, katak buat ida ilega nee kontra ona lei, tanba nee presiza tebes autoridade seguransa iha areia fronteira atu involve aan hodi fahe informasaun ba ita nia komunidade sira atu labele uza dalan ilegal.

“Kestaun ida illegal crossing ne laos buat ida foun ba ita, maibe iha tempu pandemia Covid-19 estadu emerjensia, ita tenki asegura ita nia sidadaun sira atu labele hetan moras ne’e,” haktuir nia.

Nia haktuir tan, atu asegura oinsa ita nia sidadaun sira bele kumpri regras EE autoridade seguransa tenki ezekuta regra EE neebe governu dekreta ona, dezafiu lubuk ida neebe PNTL hasoru, maka ita limita tebes ekipamentus protesaun, agora saida maka durante nee halo mak oinsa iha maskara, ba buka tan aimoruk ruma para bele aumenta stamina membru sira hodi halo servisu.

“Oras nee dadaun ita prosesu hela oinsa para bele hetan ransu ba membru sira para oinsa halao servisu iha fronteira, asaun saida maka komandu halo orienta ona Unidade Polisia Maritima (UPM) para atu asegura tasi nian, ita hotu hatene kuandu ita metin iha rai maran, movimentu nee lao fali ba tasi, entaun koloka mos pelataun ida husi Unidade Polisia Maritima ba iha parte tasi nian, para oinsa para asegura movimentu komesa husi Batugade Mota Ain,” katak nia

Nia akresenta, agora oinsa atu reforsa tan iha munisipiu Bobonaro no Covalima komandu hasai tan orientasaun para unidade espesial, liu liu kompania operasaun espesial para halao mos sira nia servisu iha neeba.

“Ami nota katak iha difikuldade iha area fronteira neeba, ezemplu fatin ba sira desnkasa susar, neebe PNTL kordenasaun ho parseiru sira, neebe ho PNTL servisu hamutuk para bele apoiu fasilita tau netik fatin mahon balu iha fronteira, fatin sira nee agora dadauk prosesu sira lao hela, fiar katak iha tempu badak kompania neebe sira fo fiar bele instala ona buat sira nee ba membru sira neebe maka koloka ba iha neeba,” dehan Komandante.

Agora situasaun seluk ida maka fila fali ba ita nia ekipamentus protesaun, entaun saida maka PNTL halo hatoo karta ba dirasaun relevante para atu bele hetan minimu maskara sira, depois husu mos ba parseiru sira apoiu mos ropa ida ou kapa ida ba membru sira uza, hanesan ho sepatu lumpur nian, para halo servisu nee laos uza botas maibe uza sepatu tahu nia.

Iha fatin hanesan Superintendente Komandante UPF Joao Sancho Pires hatete, agora dadauk lao hela iha surtu Covid-19 nia neebe maka tama estadu emerjensia ba dala haat, agora ita lao nafatinhela orienta ba komandante kompania 3, postu 30 neebe maka iha hela fronteira orienta sira para atu bele hasae volume patruillamentu nee lao hela. No oinsa para atu bele prevene moras covid nee, i laos moras covid nee deit, iha mos oinsa para atu bele prevene trans nasional ho trans krimi neebe maka lao hela.

Reportajen: Natalina Lope

Editor: Ekipa STL

LEAVE A REPLY

Please enter your comment!
Please enter your name here