Positivu Covid-19 Aumenta 14

Komisaun Nasional liu husi Ministeriu Saude (MS), rejista tan kazu konfirmadu pozitivu Covid-19 hamutuk nain 14. (Foto: STL/Jeniche da Costa)

DILI, STLNEWS.co – Komisaun Nasional liu husi Ministeriu Saude (MS), rejista tan kazu konfirmadu pozitivu Covid-19 hamutuk nain 14.

Koordenadora Jeral Komisaun COVID-19, Odete da Silva Viegas hatete, husi feto 8 no mane 6. Husi nain 14 nee sidadaun estranjeiru nain 2 no seluk Timor-oan hotu inklui mos estudante nain 7.

“Ita haree entre sira nee, ida neebe idade kiik liu mak 20 no idade boot liu mak 54, nee sira hotu asimtomátiku ka laiha sintomas,” dehan Odete ba jornalista sira liu husi konfrensia imprensa, neebe halao iha Palasiu da Sinzas, Kinta lokraik (11/02/2021).

Nia esplika, nain 12 mai husi Indonezia husi provínsia neebe lahanesan, sira mai iha 20 Janeiru 2021, sira tama Timor-Leste (TL) liu husi Pontu Entrada Batu-Gede ho pasajeiru hamutuk nain 118.

Nain 12 halo konfinamentu obrigatoriu iha otel hirak neebe governu prepara. Nomos iha ekipa vijilansia halo teste swab dala-tolu ba nain 12 nee (21 Janeiru, 1 Fevereiru, no 9 Fevereiru). Rezultadu teste hatudu katak, pasajeiru hirak nee hetan kazu pozetivu Covid-19.

Odete infroma, iha nain ida tama mai Timor iha dia 23 Janeiru 2021, no sidadaun nee mai ho Bus (transporte publiku) husi 0rovínsia Kupang, Indonezia ba Atambua. Iha loron tuir mai (24 Janeiru) nia viajen husi Atambua mai Timor, liu-husi Pontu Entrada fronteira Batu-Gede. Ekipa liña frente simu no submete ba konfinamentu iha Batu-Gede, Munisípiu Bobonaro.

Tanba tuir nia katak, iha 24 Janeiru serbísu vijilansia Ministeriu Saude ba foti amostra swab dahuluk, depois 9 Janeiru halo tan teste swab daruak nian.

“Ita haree rezultadu pozitivu, elata iha 10 fevereiru 2021. Ekipa ambulansia evakua ona pasiente nee mai izolamentu Vera Cruz, Dili,” nia informa.

Nia argumenta, total komunidade neebe halao kuarentena iha Batu-Gede, hamutuk ema nain 36 inklui pasiente pozitivu no nain 35, seluk tama klandestina ka liuhusi dalan ilegal. Ohin mos Ministeriu Saude mos fo sai tan pasiente rekuperadu Covid-19 nain 5 husi izolamentu Vera Cruz kompostu husi feto 3 no mane 2, husi nain 5 rekuperadu, nain 1 mak estranjeiru. Nomos sira nee teste ikus iha 8 no 10 Fevereiru, husi teste swab rezultadu negativu, nunee ohin ita haruka sira fila ona ba idak-idak nia família no komunidade,” nia afirma.

Entertantu dadus neebe STL asesu iha MS nia, dadus 11 Fevereiru 2021, no komulativu teste 1.999, komulativu Negativu 19.717, nomos hein rezultadu 102, komulativu kazu 100, no kazu foun positivu Covid-19 14, oras nee dadaun rekuperadu 59, komulativu rekuperadu 66, sira neebe baisa 38, kuarentena 279 (Dili 169, Munusípiu 128), auto-kuarentena 118 (Dili 92, Munisípiu 26), passa ona 14 dias 29 (Vera Cruz 28 & RAEOA 1).

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here