Postu Rua Iha Belu Zero Covid-19

SIMU VASINA - Vise Administrador Distrik Belu, J.T. Ose Luan akompania hosi Diretor Saude Distrik Belu, vizita fatin rai vasina neebe foin to’o hosi Kupang atu distribui ba 17 klinika neebe iha 12 postu administrativu iha Belu. (Foto: Espesial)

ATAMBUA, STLNEWS.co – Postu Administrativu Lamaknen no Lamaknen Selatan, neebe nia fronteira rai maran ho Munisipiu Bobonaro no Munisipiu Covalima, to’o agora zero husi kazu corona virus (Covid-19), tamba antes Covid-19 naklekar iha Distrik Belu, lia nain sira hosi postu rua nee, halo ona kultura hodi taka dalan ba Covid-19.

Tuir dadus neebe diariu nee rekoila hosi Komisaun Prevensaun Covid-19 Distrik Belu, hatudu katak husi 12 postu administrativu iha Distrik Belu, Postu Administrativu Lamaknen no Lamaknen Selatan sei zero covid-19.

Restu postu administrativu 10 hanesan, Postu Administrativu Raihat (Haekesak), Lasiolat, Tasifeto Leste, Tasifeto Oeste, Atambua Kapital, Atambua Oeste, Atambua Sul, Kakuluk Mesak, Nanaet Duabesi no Raimanuk.

Porta voz Governu Distrik Belu no Koordenador ekipa Covid-19 ba asuntu Komunikasaun Sosial, Cristoforus M. Loe Mau informa katak, tuir dadus monitorizasaun iha 17 klinika neebe namkari iha 12 postu administrativu iha Distrik Belu, postu rua mak zero Covid-19 hanesan Lamaknen no Lamaknen Selatan. Postu administrativu 10 seluk daet ona virus corona.

Maske nunee, Loe Mau apela ba populasaun iha postu rua neebe zero Covid-19 atu kuidadu an no kumpre nafatin protokulu saude Covid-19 ho uza maskra, fase liman bei-beik ho sabaun, asegura distansia social, la bele halibur malu no evita viajem ba postu seluk neebe Covid-19 naklekar makaas.

Entretantu, Administrador Postu Lamaknen, Hironimus Mau Luma no Administrador Postu Administrador Lamaknen Sul, Wendelinus Meak, apela ba populasaun iha postu rua nee atu kumpre protokulu saude Covid-19.

Administrador nain rua nee mos servisu hamutuk ho polisia no militar hodi asegura regras neebe governu implementa ona kona ba Covid-19 nomos seguransa iha fronteira rai maran hodi evita ema sai-tama Indonezia-Timor Leste liu husi dalan illegal.

Kazu Covid-19 iha Distrik Belu, komesa tun. Total kazu pozetivu 187, rekuperadu 109, ema nain 70 halao tratamentu saude iha hospital no kuarentena mandiri, nain 5 sei iha izolamentu Hospital Gabriel Manek Atambua.

Entretantu dadus neebe diariu nee rekoila husi Komisaun Prevensaun Covid-19 Provinsia Nusa Tenggara Timur (NTT) hatudu katak total kazu pozitivu to’o Kuarta (3/2/2021), hamutuk 5.683, rekuperadu 2.870, no ema nain 2. 663 sei halao tratamentu saude iha hospital no kuarentena mandiri. Ema mate kauza hosi Covid-19 hamutuk 151. Hosi total kazu nee maioria konsentra iha Kupang Kapital kompostu hosi kazu pozetivu 2.675, rekupera 1.053, pasiente neebe halao hela tratamentu saude no kuarentena mandiri hamutuk 1.553 no ema mate hamutuk 69.

Kazu Covid-19 ne’e naklekar iha 22 distrik kompostu husi Kupang Kapital, Timor Tengah Selatan, Rote Ndao, Ende, Sikka, Flores Timur, Manggarai, Nagekeo, Manggarai Barat, Sumba Timur, Sumba Barat Daya, Sumba Barat, Timor Tengah Utara, Kupang, Lembata, Alor, Malaka, Sumba Tengah, Manggarai Timur, Ngada, Belu no Sabu Raijua.

Atu kombate no hakotu Covid-19 iha NTT, agora dadaun governu distribui ona vasina ba distrik no distrik balun implementa ona programa vasina. Iha Distrik Timor Tengah Utara (TT), programa vasina nee hahu iha Klinika Lurasik, Postu Administrativu Biboku Oeste.

Administrador Postu Biboki Oeste, Hironimus Ndun ba jornalista hateten katak programa primeiru vasina halao iha klinika Lurasik ho objetivu atu hakotu Covid-19 neebe naklekar iha NTT.

“Nuudar autoridade lokal iha nee ami halao programa nee atu hakotu virus corona neebe ameasa ba ema hotu-hotu,” dehan nia.

Iha Distrik Belu, agora dadaun iha ona 3.080 vasina Covid-19 husi kompania China, Sinovac. Maibe, to’o agora seidauk distribui ba 17 klinika no 12 postu administrativu iha Distrik Belu.

Reportajen: Mikael Mali Mau
Editor: Ekipa STL

LEAVE A REPLY

Please enter your comment!
Please enter your name here