Povu RAEOA Preokupa Ho Moras COVID-19

Relasiona ho situasaun moras Covid-19 neebe hamate ona ema iha nasaun vizinu Indonezia liu liu iha lina fronteira hanesan Atambua, Kefa nomos Soe, halo populasaun RAEOA preokupa tebes ho situasaun sira hanesan nee. (Foto: Pajina Facebook Primeiro Ministro: S.E. Taur Matan Ruak)

DILI, STLNEWS.co – Relasiona ho situasaun moras Covid-19 neebe hamate ona ema iha nasaun vizinu Indonezia liu liu iha lina fronteira hanesan Atambua, Kefa nomos Soe, halo populasaun RAEOA preokupa tebes ho situasaun sira hanesan nee.

Tuir Prezidente Autoridade Rejiaun Administrativa Espesial Oecusse Ambeno(RAEOA), Arsenio Bano katak, enkontru ho Primeiru Ministru (PM), Taur Matan Ruak hodi kolia Kona ba situsaun sira iha Rejiaun Administrativa Espesial Oecusse Ambeno (RAEOA), liu liu oinsa halo prevensaun Covid-19, nunee moras nee la bele tama iha RAEOA.

“Hanesan ita bot sira hatene iha loron 23 Dezembru RAEOA deteta kazu positivu Covid-19 tolu (3), tanba nee ohin informa ba xefe governu katak pasiente alta hotu ona depois iha izolamentu durante loron 14 no filla hela iha karantina durante loron hitu teste dala ida tan sira negativu tanba nee sira fila ona,” dehan Arsenio hafoin remata enkontru ho Xefe Governu, iha Palasiu Governu, Dili, Kinta (21/01/2021).

Nia dehan, populasaun RAEOA dadaun nee preokupa tebes ho moras Covid-19 tanba iha nasaun vizinu Indonezia liu liu iha lina fronteira hanesan Atambua, Kefa, nomos Soe moras refere kontinua sae no hamate ona ema.

“Hau atu dehan deit katak populasaun RAEOA dadaun nee preokupa tebes ho moras Covid-19 nee, tanba iha nasaun vizinu Indonezia liu liu iha Lina fronteira sira hanesan Atambua, Kefa, nomos Soe situasaun la diak, tanba hanesan iha Soe iha ema nain tolu ga hat mak mate ona no Madre ida iha Atambua no Kefa nain ida,” nia esplika.

Nia hatutan, dadaun nee nia parte kontinua halo serbisu makas nunee bele prevene populasaun RAEOA husi moras Covid-19 nee.

“Ami mos serbisu makas liu liu oinsa halo prevensaun iha lina fronteira tanba dadaun nee koopera ona ho Unidade Patroilamentu Fronteira (UPF) nomos husi Minesteriu Saude oinsa atu hari tan fatin karantina no balun agora atinje 60% ona iha pontu entrada hotu hotu hanesan Sakato, Pasabe, Oesilu, nomos Citrana,” nia esplika.

Arsenio mos husu ba populasaun RAEOA sira tenki kuidadu an liu husi halo prevensaun tanba situasaun iha lina fronteira sira hanesan Atambua, Kefa, no Soe ospital sira hahu la simu ona pasiente. “Ami akompania ho besik situasaun iha Atambua, Kefa, nomos Soe sira nia ospital nakonu ona ho pasiente no lasimu tan ona ema moras.

Oecusse labele tama iha situasaun sira hanesan nee, tanba nee ita tenki serbisu mak oinsa bele halo prevensaun ba moras Covid-19 hanesan halo tuir protokolu Ministeriu Saude nia tenki uza maskara, tenki fase liman bebeik, mantein distansiamentu sosial, no labele halibur ema barak demais liu liu halo movimentu ilegal iha lina fronteira sira,” hakotu nia.

Reportajen: Alberto Menezes
Editora: Carme Ximenes

LEAVE A REPLY

Please enter your comment!
Please enter your name here