PR Apresia Servisu OMS Ba Prevensaun Covid-19

Reprezentante OMS, Rajesh Pandav, ohin dadersan hakaat mai Palasiu Prezidente Nicolau Lobato hodi kumprimenta no despede Prezidente Republika Francisco Guterres Lú Olo. (Photo: Media PR)

DILI, STLNEWS.co – Prezidente Republika (PR) Francisco Guterres Lú Olo, apresia ba Organizasaun Mundial Saude (OMS) nia servisu ba prevensaun Covid-19 iha Timor Leste.

Kestaun nee hatoo husi representante Organizasaun Mundial Saude (OMS), Rajesh Pandav ba jornalista bainhira remata halo enkontru ho Prezidente Republika Francisco Guterres Lú Olo iha Palasiu Prezidente Nicolau Lobato, Kuarta (02/09/2020).

Reprezentante OMS dehan iha hasoru malu nee, PR mos apresia ho servisu OMS nia, no husu atu servisu makaas liu tan atu bele kontra Covid-19 iha Timor leste.

“Prezidente Republika apresia ho servisu Organizasaun Mundial Saude (OMS) nia ba prevensaun Covid-19, nomos ba servisu saude publika halo iha Timor, no ba oin tenke halao servisu makaas atu kontrola Covid-19, nomos hasae serbisu saude publiku nia iha Timor.” hatete reprezentante Organizasaun Mundial Saude (OMS), Rajesh Pandav.

Nia hahu servisu iha OMS Timor-Leste iha 2011, nuudar Konselleiru ba Polítika Saude too 2015, tinan neebe nia hahu halao knaar nuudar reprezentante OMS iha Timor-Leste. Rajesh Pandav sei husik Timor-Leste iha 16 Setembru no sei halao knaar nuudar reprezentante OMS iha Nepal.

No vizita ida nee mos hanesan vizita kortezia ida ho Prezidente Republika. Rajesh Pandav hatete atinzimentu saude publiku barak iha Timor Leste, primeiru kazu malaria neebe uluk aas tebes kuaze rihun atus rua (200.000) kada tinan, maibe agora kazu malaria laiha iha Timor, no OMS mos konsege hatun moras sarampo, nomos kontrola moras rubela no kontrola moras sira seluk.

Nia hatutan serbisu importante ida mak halo prevensaun ba Covid-19, tanba iha Timor kazu oituan deit iha rua nulu resin hitu (27) kazu, maibe konsege rekopera liu husi aprosimasaun governu bele hatun kazu Covid-19 iha Timor, no espera katak bele kontinua tan serbisu nee ba oin hodi halo kontrola ba Covid-19.

“Iha Timor leste, OMS haree liu ba saude publika nia atu kontrola Covid-19. No iha Timor Leste ita haree katak kazu neebe mak barak nee ho sidadaun ou ema sira neebe tama husi fronteira. Tanba nee mak ita presiza haree ba ida nee, maibe OMS nia ami kontinua halo medidas preventiva liu liu ema sira neebe mak tama mai husi fronteira, maibe ba nasaun idak idak sira bele haree tok medidas saida mak importante ba nasaun.” dehan nia.

Nunee mos haree kazu Covid-19 neebe mak iha Marsu liu ba, ema barak komesa tauk ho prevensaun hanesan fase liman ho sabaun, uza maskara, no distansia fizika, ezemplu fani karik tenke taka ho liman sikun, entaun tuir mai salva duni ou prevene Covid-19.

Nia hatutan iha tempu ikus nee ema barak mak la uza maskara no lahalo distansia sosial, maibe sei atu prevene nafatin Covid-19 presiza tuir nafatin medidas preventiva, neebe governu hasai ezemplu fase liman ho sabaun regularmente, limita halibur malu, karik halibur malu tenke uza maskara no halo distansia, nunee mos bainhira fani tenke uza liman sikun hodi taka ibun no seluk tan.

Reportajen: Emerenciana Pinto

Editor: Carme Ximenes

LEAVE A REPLY

Please enter your comment!
Please enter your name here