Presiza Kumpri Regra, Nunee Hadook Aan Husi Covid-19

Padre Richardo Pasang, SVD. (Foto: STL/Emerenciana Pinto)

DILI, STLNEWS.co – Tuir Padre Richardo Pasang SVD katak, sidadaun hotu presiza kumpri nafatin regra neebe mak Governu hatun, nunee bele hadook aan husi Covid-19.

“Maluk sira hotu nuudar sidadaun Timor Leste, ita hotu kumpri regras Estadu Emerjensia tamba ita lakohi moras nee daet ba ita hotu liu husi atividades sosial no mos igreja, nee duni igreja hakarak kolabora ho estadu hodi foti desisaun atu avizu katak laiha partisipasaun sarani iha misa durante tempo emerjensia.” hatete Padre Richardo Pasang SVD Ba STL via telefone bainhira remata refleksaun diaria, Sabadu (09/01/2021).

Amo lulik nee hatutan sarani no sidadaun sira kontinua matan moris nafatin ho fenomena neebe mak iha.

“Nuudar sarani no sidadaun tenke matan moris ho situasaun real neebe mak akontese balun iha fatin publiku halo atividade lao hanesan babain, se ita haree fasil liu moras nee daet se laiha distansia, la uza maskra no la tuir protokulo husi saude. Nee duni, presiza instituisaun estadu nian no mos igreja, kolabora atu ita bele kuidadu ita nia povo no mos sarani sira husi moras ida nee” katak Padre.

Bibi Atan Kreda Katolika nee hatutan igreja mos lakohi katak wainhira misa iha partisipasaun sarani depois misa ema balun hetan moras ida nee, bele fo kulpa ba igreja tamba sarani ida neebe mai tuir misa nia mos moris iha sosiedade, nia mos povo neebe karik mos halo movimentu ou atividades atu sustenta nia moris ekonomia.

“Ita lahatene katak ema neebe mai misa nee hetan moras ida nee ka lae” katak nia.

Iha parte ketak Primeiru Ministru Taur Matan Ruak mos hatoo agradese ba Bispu liu-liu Igreza neebe mak durante nee kolabora ona ho governu oinsa mak atu hadook aan husi moras surtu Covid-19 nee rasik.

PM husu ema hotu atu kontinua kumpri regra neebe mak iha, tanba moras Covid-19 nee mai la fihir sese deit tanba nee diak prevene aan husi moras aat nee.

Tuir observasaun neebe mak STL hetan iha loron boot natal no tinan foun, Igreja mos kumpri regra neebe husi governu hodi suspende no lahalo misa maibe iha fatin publiku movimentu lao hanesan babain ezemplu iha merkadu kontinu lao, no laiha distansia nomos fatin publiku balun.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here