Suspeitu Hein Rezultadu Teste Nain 221

Diretora Kordenadora Jeral Komisaun Prevensaun ba Covid-19, Dr. Odete da Silva Viegas, hato'o liu husi konferensia imprensa iha Palasiu das Cinzas, Caicoli, Kuarta (19/08/2020). (Photo: STL News)

DILI, STLNews.co – Suspeitu ne’ebé agora sei hein rezultadu teste husi laboratorium nasional hamutuk 221.

Tuir Diretora Kordenadora Jeral Komisaun Prevensaun ba Covid-19, Dr. Odete da Silva Viegas, hato’o liu husi konferensia imprensa iha Palasiu das Cinzas, Caicoli, Kuarta (19/08/2020).

“Total kumulativu teste hamutuk ema nain 5.067, maibe sira ne’ebé sei hein rezultadu teste husi laboratorium hamutuk ema nain 221,” dehan nia.

Nia afirma, no husi rezultadu teste laboratorium hatudu rezultadu negativu hamutuk 4.821, i agora dadaun pasiente ne’ebé baixa laiha no kazu mate mos laiha.

Nia tenik, ema sira ne’ebé iha fatin kuarentena obrigatoriu, ho auto kuarentena hamutuk 750.

Tanba ne’e, sira ne’ebé iha kuarentena obrigatoriu hamutuk 548, iha Dili ema nain 484 no iha munisipiu ema nain 5. No sira ne’e iha auto kuarentena hamutuk 202, iha Dili ema nain 201, no iha munisipiu ema nain 1.

Nia hatutan, no ema sira ne’ebé pasa ona loron 14 iha fatin kuarentena obrigatoriu hamutuk 3.201, sire ne’ebé hela iha Dili hamutuk 2.733, no hela iha munisipiu sira hamutuk 468.

Hakotu nia, atu informa mos total hotel sira ne’ebé maka Ministeiru Saúde uza ba konfinamentu obrigatoriu, hamutuk iha oteis 12.

Reportajen: Domingas Soares

Editor: Ekipa STL

LEAVE A REPLY

Please enter your comment!
Please enter your name here