Tau Forsa Hamutuk, Combate Covid-19

Segundu Komandante Polisia Nasional Timor Leste Munisipiu Dili, husu ba komunidade, atu hamutuk forsa servisu ho PNTL, atu nunee bele prevene Covid-19, tanba iha Atambua (Indonezia) virus nee hamate ona ema nia vida. (Foto: STL/Claudios de Jesus)

DILI, STLNEWS.co – Segundu Komandante Polisia Nasional Timor Leste Munisipiu Dili, husu ba komunidade, atu hamutuk forsa servisu ho PNTL, atu nunee bele prevene Covid-19, tanba iha Atambua (Indonezia) virus nee hamate ona ema nia vida.

Dehan Superintendente Euclides Belo, ba jornalista sira liu husi konferensia imprensa, neebe halao iha KMD, Caicoli, Dili, Segunda (18/01/2021).

“Vitima Covid-19 iha Atambua, laos hetan tan tratamentu saude iha Izolamentu, maibe nee la ba izolamentu ona, maibe ba iha ‘Aldea la fila’ ona, tanba nee diak liu ita prevene no ita hotu sai forsa ida deit hodi bele kombate,” dehan nia.

Nia hatutan, dadauk nee estudante sira neebe maka remata sekundaria, sira hotu mai konsentra hamutuk iha Dili, tanba Eskola Ensinu Superior nee iha Dili barak, nunee koordena oinsa para hatene ho diak paradeiru estudante hirak neebe maka mai halo estudu iha Dili.

Depois sei koloka pesoal sira atu bele hasae volume garante seguransa, tanba hare ba prosesu aprendizajen ba eskola komesa hahu.

“Eskola sira bele mantein kumpri regras protokolu husi parte saude ninian, hanesan tau bee hodi bele fase liman, no sira jere eskola ho diak atu labele iha perigu nia laran,” nia esplika.

Segundu Komandante informa, maneira jere eskola hanesan mos internal eskola nian, maibe PNTL nia knaar maka atu kontrola, no hare mos ba regras hirak neebe dekreitu lei koalia ona, kona ba meus prevensaun ba virus Covid-19. Iha prosesu aprendizajen neebe lao nee, husu para mantein kumpri ba iha regras hirak neebe fo sai ona.*

Reportajen: Claudios de Jesus
Editora: Carme Ximenes

LEAVE A REPLY

Please enter your comment!
Please enter your name here