Taur: Povu Keta Kanta Hasoru Corona

COVID-19 dadaun konsege hamate ema besik juta ida no infetadu besik juta rua nulu resin, tanba nee husu povu Timor Leste keta kanta uluk vitoria hasoru Corona virus. (Photo: STL News/Alberto Menezes)

DILI, STLNEWS.co – COVID-19 dadaun konsege hamate ema besik juta ida no infetadu besik juta rua nulu resin, tanba nee husu povu Timor Leste keta kanta uluk vitoria hasoru corona virus.

Primeiru Ministru Taur Matan Ruak hatete, povu Timor Leste keta kontenti uluk, tanba moras COVID-19 nee kontinua ameasa ema nia moris.

“Grasa adeus matebian sira nafatin ajuda, ita iha kazu hamutuk 27, rekuperadu nain 25 no kazu sei ativu, ho nune keta kanta lai vitoria hasoru COVID-19, tanba moras nee kontinua lao,” dehan PM Taur, ba jornalista sira iha Edifisiu Ministeriu Interior, Dili, Sesta nee (04/09/2020).

Tanba nee Xefe Governu dehan, desizaun estende tan Estadu Emerjensia nee hanesan responsabilidade ida neebe governu iha, nunee bele proteze sidadaun sira husi moras COVID-19.

“Moto neebe saude iha katak, saude iha ita idak-idak nia liman, tanba nee sidadaun sira mos iha obrigasaun, atu fo sira nia kontribuisaun hanesan kumpri kona ba medidas sanitaria sira neebe Ministeriu Saude nomos Organizasaun Saude Mundial fo sai ona hanesan fase liman, uza maskra, distansiamentu sosial,” dehan PM Taur.

Eis aman ba nasaun nee husu populasaun Timor Leste, presiza tebes kumpri kona ba medidas sanitaria sira neebe fo sai ona, wainhira la kumpri medidas nee mak sei daet uluk ema ida ba ema seluk.

“Karik ita la halo tuir medidas sira nee, primeiru moras mai sei kona uluk ita, tanba la hare aan no kuidadu aan no segundu mak bele hadaet iha familia no komunidade sira,” dehan Xefe Governu.

Iha biban nee Xefe Governu mos apela ba inan aman, joven sira no sidadaun hotu-hotu para atensaun, nee laos buat foun ida, tanba ema neebe infetadu besik juta 20 resin no mate besik 1 juta iha mundu tomak.*

Reportajen: Alberto Menezes
Editora: Carme Ximenes

LEAVE A REPLY

Please enter your comment!
Please enter your name here