Taur Prontu Vasina Primeiru

Primeiru Ministru (PM), Taur Matan Ruak. (Foto: Media PR)

DILI, STLNEWS.co – Primeiru Ministru, Taur Matan Ruak prontu simu vasina primeiru, bainhira Timor Leste implementa vasinasaun hodi prevene Covid-19.

Kestaun nee Xefe Governu hatoo, bainhira remata enkontru ho Prezidente Republika, Francisco Guterres Lú Olo, iha Palasiu Prezidente Nicolau Lobato, Bairru Pite Dili, Kinta (21/01/2021).

“Hau latauk atu simu vasina, tanba laiha dalan seluk,” dehan Xefe Governu.

Eis aman ba nasaun nee hatutan, problema nee laos prontu ou lae, maibe sidadaun neebe lakoi mate diak liu simu vasinasaun. Hakarak mate lakoi simu mos labuat ida.

“Se mak lakoi mate tenke simu vasina, se hakarak mate lakoi simu labuat ida, Portugues dehan ‘que nào save viver que moram’, se mak lahatene moris diak liu mate, se hau hakarak moris tenke vasina neebe ema hotu neebe mak moris nee vasina tenke simu, ida neebe lakoi hakarak mate lalais nia bele ba uluk,” katak eis aman ba nasaun nee.

Iha biban nee Primeiru Ministru mos informa ba Prezidente Republika, konaba estensaun Estadu Emerjensia relasiona ho numeru Covid-19 neebe aumenta iha rai laran.

“Hanesan ita boot sira hatene iha Dezembru ita iha nain 15, horiseik tun mai 5 depois too mai lokraik aumenta tan ida agora ita iha nain 6,” dehan PM TMR.

Nia dehan, kona ba massal screening oras nee Ministeriu Saude iha planu hela no tempu badak sei haree saida mak bele halo. Tenke halo tanba informasaun neebe dadaun nee iha planea para atu ba Oecusse, depois mak neneik iha parte sira fronteira nomos parte Dili laran, maibe Ministeriu Saude sei aprezenta kalendariu.

Iha parte ketak sosiedade sivil Program Officer ASIA Justice and Rights (AJAR), Inocencio Xavier dehan, sosiedade sivil lakonkorda atu halo vasinasaun ba povu Timor Leste, se wainhira halo duni vasinasaun, vasina uluk ba estrutura Governu.

“Ita lapresiza halo ida nee, se atu vasina duni entaun fo ba ministru sira deputadu sira, estrutura governu ida nee, povu baibain lapresiza,” katak Inocencio.*

Reportajen: Emerenciana Pinto/EST.V
Editora: Carme Ximenes

LEAVE A REPLY

Please enter your comment!
Please enter your name here