Timor Leste Deteta Tan Sidadaun Indonezia 1 Pozitivu Covid-19

Pasiente konfirnadu neebe iha izolamentu Vera Cruz Ministra Saúde, Odete Freitas Belo (Photo: STL News/Domingas Soares)

DILI, STLNEWS.co – Timor Leste deteta tan kazu pozitivu covid-19 nain 1, husi sidadaun Indonezia no agora daduk pasiente refere ona ba sala izolamentu Vera-Cruz hodi halo tratamentu.

Ministra Saude, Odete Maria Freitas Belo, hatoo liu husi konferensia pers iha Palasio Sinzas, Caicoli Kuarta (26/08/2020).

“Hau hakarak informa ba publiku katak, ohin Ministeriu Saude deteta tan kazu Pozitivu Covid-19 nain 1 husi sidadaun Indonezia, mane ho idade 23 serbisu tekniku kompania Wartsila, no agora dadauk pasiente refere ona ba sala izolamentu Vera-Cruz,” dehan Ministra Saude.

Ministra Saude informa, sidadaun nee hahu viajen husi Jakarta – Kupang Indonezia ho Batik Air iha loron 11 fulan Agostu tinan 2020, no iha loron nee kedas pasajeiru kontinua viajen husi Kupang – Atambua ho Lion Air iha Atambua hela iha otel Matahari.

Nia afirma, husi Atambua mai Dili iha loron 12 fulan Agostu total pasajeiru sira neebe tama iha loron 12 hamutuk ema nain 84, nain 7 tama auto kuarentena no 77 iha konfinamentu obrigatoriu no pessoal nee rasik kompleta ona loron 14. Amostra foti iha loron 22 fulan Agostu pasajeiru konsege halo kontaktu besik ho ema nain 14 no agora dadauk organiza ona atu foti ema sira nee nia amostra.

Ministeiru Saude rekomenda ema hotu presiza tau atensaun ba medidas preventiva, hodi bele proteje aan no proteje mos ita nia komunidade ho nasaun husi surtu Covid-19.

Husu mos ba komunidade hotu atu labele paniku, i nafatin halo prevensaun ba Covid-19 liu husi, uza maskra bainhira sai husi uma no kontinua halo distansia fiziku nomos fase liman bebeik ho sabaun, evita mos halibur malu iha grupu neebe halibur ema barak.

Nia relata mos dadus kumulativu ezame laboratoriu ho rezultadu negativu hamutuk 5.241, no ema neebe liu ona periudu kuarentena ka konfinamentu obrigatoriu hamutuk nain 3.566 sira neebe hela iha Dili hamutuk 3.086 no hela iha munisipiu sira hamutuk 480.

Total ema neebe iha kuarentena ka konfinamentu obrigatoriu hamutuk 311, iha Dili nain 210, no iha Munisípiu sira 101. I total ema neebe halo uto kuarentena hamutuk 137, iha Dili nain 134, no iha Munisipiu nain 3.

Governante nee husu ba sidadaun sira neebe sei kumpri hela kuarentena obrigatoriu ho auto kuarentena atu labele vizita malu iha laran, hodi nafatin mantein spasu labele simu vizitante husi familia sira, nomos husu atu idak-idak tur hakmatek iha fatin i tenke koopera ho pesoal saude sira bainhira atu halo teste ruma, no nafatin fo fiar ba MS atu halao sira ninia servisu, i labele kria fali rumoris neebe maka laiha faktus

Reportajen: Domingas Soares

Editor: Ekipa STL

LEAVE A REPLY

Please enter your comment!
Please enter your name here