Timoroan Ida Positivu Covid-19

Koordenador Jeral Komisaun Covid-19, Odete da Silva Viegas. (Foto: Espesial)

DILI, STLNEWS.co – Ministeriu Saude (MS) rejistu sidadaun Timoroan ida, neebe konfirmadu positivu Covid-19.

Koordenador Jeral Komisaun Covid-19, Odete da Silva Viegas, liu husi konferensia imprensa iha MS, Sesta (29/01/2021) hatete, ohin 29 Janeiru 2021 Ministeriu Saude rejistu tan estudante sidadaun Timoroan nain ida (1) ho idade 15, neebe positivu Covid-19 ho asintomatiku.

“Ita rejistu tan kazu positivu foun ida 28 de Janeiru, sidadaun Timoroan, mane ho tinan 15 laiha sintomas, signifika sidadaun nee laiha isin manas, laiha mear ka inus been,” hetete Odete.

Nia dehan, sidadaun nee viajen husi Timor ba Atambua, iha loron 4 Janeiru ba semana rua iha Atambua, fila-fali husi Atambua iha 18 Janeiru, no mai iha toba tan kalan rua iha Wini, parte Kefa nian.

“Ita nia sidadaun nee iha 4 Janeiru 2021 nia halao viajen ba iha Atambua, Indonezia ho motor privadu, ninia razaun atu prolonga visa. Iha Fatubanao, Atambua nia hela durante semana rua (2) iha ninia tio nia uma. Depois iha 20 Janeiru 2021 nia tama Timor-Leste liu husi fronteira Sakato, Oecusse hamutuk ho estudante nain 7 seluk, ekipa Covid-19 koloka kedas sira ba halo kuarentena iha otel Oeupun, iha Rejiaun Administrativa Oecusse Ambeno (RAEO).” dehan Odete.

Odete da Silva Viegas, dehan, ekipa vijilansia halo teste Swab ba sira iha 28 Janeiru no rezultadu teste husi laboratorim relata katak, sidadaun nee positivu Covid-19, no dadaun nee pasiente refere evakua ona ba sala izolamentu iha Oecusse.

“Ita-nia maluk neebe hela iha kuarentena Oeupun hamutuk nain 68, sira tama ho data ida neebe lahanesan. Sira neebe liu husi dalan legal mak nain 8 nee no 56 seluk liu husi dalan ilegal.” tenik nia.

Entretantu dadus 29 Janeiru 2021, neebe Ministeriu Saude fo sai katak iha dadus komulativu teste 18.902 no hein rezultadu hamutuk 166, komulativu kazu 69, komulativu rekuperadu 54, kazu foun positivu covid-19 nain 1, atual baixa 19, rezultadu negativu 18.667.

Total kuarentena 230 (Dili: 128 & Munisipiu: 102 ), auto kuarentena 192 (Dili: 181 & Munisipiu: 11), kompleta ona loron 14 hamutuk 7497 (Dili: 6182 & Munisipiu: 1315).*

Reporatajen: Jeniche da Costa
Editor: Carme Ximenes

LEAVE A REPLY

Please enter your comment!
Please enter your name here