Timoroan Nain 9 Indentifikadu Kazu Pozitivu COVID-19

Ministra Saude (MS), Odete Maria Freitas Belo. (Foto: STL/Donaciano Magalhães)

DILI, STLNEWS.co – Iha loron Tersa (22/12/2020), Ministeriu Saude (MS) anunsia kazu pozitivu nain rua no ohin loron Kinta (24/12/2020), kontinua anunsia tan kazu foun hitu (7), total hamutuk sia (9), kazu hirak nee husi kuarantena Tasi Tolu.

Liu husi konferensia imprensa Ministra Saude (MS) Odete Maria Freitas Belo, hatete, durante nee, kazu Covid-19 neebe MS fo sai kuaze kazu importadu hotu, maibe husi kazu sia (9) neebe detekta nee nain rua fo sai antes ona iha loron Tersa (22/12/2020) iha semana hirak liu ba, maibe nain tolu iha Oecusse detata pozitivu no dadauk nee iha ona sala izolamentu Oecusse, nunee mos iha loron Kuarta (23/12/2020) deteta pasajeirus nain ida (1) no ohin Kinta deteta tan nain tolu (3) neebe pozitivu ba COVID-19, pasajeiru hirak nee profisional saude asegura hotu iha sala izolamentu Vera-Cruz. Hatete Ministra Saude (MS) Odete Maria Freitas Belo ba jornalista sira liu husi konferensia imprensa, hafoin remata enkontru iha SAMES, Kinta (24/12/2020).

“Sira nain sia, nain tolu izola iha sala izolamentu Oecusse no iha Dili kuarentena Tasi Tolu nain neen ita evakua hotu ona ba iha sala izolamentu Vera-Cruz,” nia esplika.

Nia informa pasiente COVID-19, nain sia nee maioria sidadaun Timoroan maibe sira ida-idak halao nia viajen diferente.

“Hau hanoin ba nain hirak seluk hau labele fo komentariu kona ba sira nia istoria viajen, sira mai husi neebe maibe ita iha informasaun, ida nee soke seidauk kompletu,” nia informa.

Tuir informasaun neebe STL asesu iha terenu, iha pasiente ho idade 26 mane ho kazu pozitivu sintomatiku, pasajeirus neebe positivu viagem husi Lisboa, Portugal – Doha, Qatar no nia too iha Dili, Timor Leste iha loron 14 fulan Dezembru 2020, ho aviaun Euro Atlantic Airways, neebe akompania ho total pasajeiru 144, husi numeru hirak nee pasajeiru 66 kuarentena iha Tasi Tolu no nain 63 auto kuarentena iha uma.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here