TL Presiza Estende EE

Primeiru Ministru (PM) Taur Matan Ruak. (Foto: Gabinete Primeiru Ministru)

DILI, STLNEWS.co – Timor Leste presiza estende nafatin Estadu Emerjensia (EE) nunee bele prevene Corona Virus, tanba nasaun vizinu sira moras nee kontinua aumenta.

Kestaun nee hatoo husi Primeiru Ministru, Taur Matan Ruak ba jornalista sira, bainhira remata enkontru ho PR, iha Palasiu Prezidente Nicolau Lobato, Dili, Kinta (26/11/2020).

“Covid-19 ita agora kazu laiha, ita rekopera hotu ona, tanba nee atu prevene diak liu halo estensaun nafatin ba estadu emerjensia,” katak PM Taur.

Xefe Governu dehan, risku mai TL sei makaas tanba nasaun vizinu sira moras nee sae makaas. TL nia esperensia ho nasaun sira seluk lahanesan, nasaun seluk halo estadu emerjensia kuandu moras nee iha ona rai laran hodi daet ba komunidade.

“Ita nia oin seluk, ita halo EE para taka dalan, atu moras nee labele tama iha ita nia rai, buat rua nee lahanesan ita kontinua halo ida nee,” katak Xefe Governu.

Desizaun ba estadu emerjensia, tuir Primeiru Ministru katak nia aplikasaun iha pratika nee fleksibel tuir rejulusaun moras iha rai laran. Kuandu moras Covid-19 laiha husik atividades loron loron lao normal, kuandu makaas liu aperta oituan regirozu oituan.

Iha biban nee PM hatete, kona ba sesta bazika neebe mak oras nee fahe ba komunidade PM mos rona komunidade sira manifesta hanoin, tanba nee mak ministeriu relevante sira presiza esforsu aan makaas.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here