TL Rezistu Tan Kazu Konfirmadu Pozitivu Covid-19 Nain 14

Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo. (Foto: STL/Donaciano Magalhães)

DILI, STLNEWS.co – Timor-Leste (TL) ohin loron Kinta (11/03/2021) rezistu tan kazu konfirmadu pozitivu Covid-19 hamutuk 14, husi Munisipiu Dili nain sanulu resin rua (12) no nain rua (2) husi munisipiu Covalima. Hatete Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo, liu husi konferensia imprensa iha Sala Situasaun Sentru Integradu Jestaun Krize (SIJK), CCD-Dili.

“Husi horisehik mai ohin, ita iha Dili husi amostra neebe rekolla iha atividade buka tuir kontaktu besik, iha tan sanulu resin rua (12) mak pozitivu, nain rua (2) husi munisipiu Covalima nian, tanba nee ita iha kazu foun 14,” hatete Rui.

Nia dehan, pozitivu ida (1) kontaktu besik husi kazu Bebonuk, pozitivu ualu (8) kontaktu besik husi kazu sira SEFOPE, pozitivu rua (2) kontaktu besik ho kazu Ministeriu Finansas no mos Ministeriu Transporte no Komunikasaun, pozitivu Covid-19 nain ida (1) iha Aldeia 4 de Setembru, Tasi-tolu, Dili.

Nia esplika, kazu detetadu pozitivu iha Dili, hamutuk hotu tolu nulu resin neen (36), fahe ba foku/agrupamentu/cluster hanesan BTN II-Terra Santa, Suku Madohi kazu 6, Aldeia Gólgota, Madohi kazu tolu (3). Nomos Aldeia Lurumata, Suku Madohi kazu (2), Aldeia 4 Setembru, Comoro kazu ida (1), Aldeia Fomento I, Suku Comoro kazu tolu (3), Aldeia 05, Suku Fatuhada, kazu tolu (3), Bebonuk kazu rua (2), Delta kazu ida (1), Ministeriu Finansas kazu tolu (3), SEFOPE kazu sia (9), Ministeriu Transporte no Komunikasaun kazu rua (2), no Hospital Nacional Guido Valadares kazu ida (1). Iha tolu nulu resin neen (36) kazu iha cluster sanulu resin rua (12), instituisaun haat (4), Suku haat (4) iha Postu Administrativu Dom Aleixo ninia.

Nia aproveita oportunidade atu esplika ba publiku tomak, konseitu kontaktu besik wainhira deteta kazu konfirmadu ida, presiza buka tuir ema hotu neebe halao kontaktu besik ho kazu nee.

“Nee ita tenke tama iha kriteriu kontaktu besik ema hotu neebe iha kontaktu, ka hasoru malu ho ema ruma neebe rezultadu teste pozitivu, tanba durante ka liu 15 minutus, iha distansia menus husi metru ida (1), bele iha uma laran, ka bele mos iha liur,” nia informa.

Nia esplika, moris hamutuk iha uma ida ho ema ruma neebe rezultadu teste pozitivu, tuur iha distansia kadeira rua ho ema ruma neebe teste pozitivu, iha transporte publiku terrestre, iha ro-ahi ka iha aviaun, nomos hamutuk iha fatin sira hanesan uma laran, ka fatin sorumutuk, ho ema neebe iha rezultadu teste pozitivu durante liu oras rua nia laran.

Nia informa wainhira halo kontaktu fiziku ho ema neebe rezultadu teste pozitivu no mos halo atendimentu ba pasiente pozitivu, tenke uza ekipamentu protesaun individual ho loloos, ekipa konjunta saude nia iha terrenu agora fokus liu iha rekolla amostra husi kontaktu besik.

“Tuir kriteriu neebe defini iha leten, hodi nunee bele hakotu korrente transmisaun iha foku/agrupamentu/cluster hirak neebe temi ona iha leten. Ita sei iha amostra atus-ualu resin (180) mak hein ninia rezultadu. Tan nee laboratoriu presiza fokus ba ema neebe kontaktu besik ho sira neebe pozitivu. Sira neebe la prienxe kriteriu neen (6) neebe temi iha leten, favor ida lalika preokupa demais, maibe importante mak nafatin pratíka metodu ijiene no protesaun pessoal neebe esplika bebeik ona.” dehan nia.

Eis PM nee husu ba populasaun iha kapital Dili laran tomak, atu nafatin kalma, lalika paniku, halo tuir regra, konfinamentu domisiliariu jeral, ba populasaun rezidente iha Munisipiu Dili, fo tempu ba ekipa konjunta saude buka tuir kontaktu besik sira hotu.

Entretantu tuir dadus jeral, kazu konfirmadu pozitivu Covid-19 foun 14, kazu rekuperadu 0, kazu ativu oras nee dadaun iha izolamentu Tasi-tolu no Vera Cruz hamutuk nain 65.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here