TL Sai Ezemplu Kombate Covid-19 Iha Mundu

Primeiru Ministru Interinu (PMI) Jose Reis. (Foto: Espesial)

DILI, STLNEWS.co – Timor Leste sai ezemplu ba mundu internasional kombate Covid-19, tanba hahu implementa Estadu Emerjensia governu foti desizaun urjenti taka fronteira terestre no aero, nunee bele prevene transmisaun husi estranjeiru mai rai laran.

Kestaun nee hatoo husi Primeiru Ministru Interinu (PMI) Jose Reis, bainhira debate Pedidu Estensaun Estadu Emerjensia ba dala sia, iha Parlamentu Nasional, Kuarta, (30/12/2020).

“Timor Leste maske hasoru dezafius oin-oin maibe ita sai ona nudar ezemplu Mundial hodi kombate surtu Covid-19,” dehan PMI Jose.

Tuir nia, durante hahu implementa Estadu Emerjensia Timor Leste, hatudu ona nia kapasidade neebe bot atu organiza oinsa halo prevensaun ba moras Covid-19 nee.

“Estratejia sira neebe define so konsege konkretija ho kolaborasaun masimu ho orgaun soberania sira hotu, neebe tuir deklarasaun EE, nunee bele foti medidas sira neebe nesesariu hanesan distansiamentu sosial, kontrolu sanitaria no epidemilojika,” nia esplika.

Enkuantu iha loron 24 Dezembru Ministeriu Saude fo sai ona katak, dadaun nee Timor Leste iha fali ona kazu ativu Covid-19 hamutuk ema nain 13, neebe dadaun nee halo hela tratamentu iha sala izolamentu Vera Cruz.*

Reportajen: Alberto Menezes
Editora: Carme Ximenes

LEAVE A REPLY

Please enter your comment!
Please enter your name here