Universidade Kumpre KO, MESSK Haruka Ona Sirkular

DILI, STLNEWS.co – Universidade da Paz (UNPAZ), kumpre nafatin regras ba Konfinamentu Obrigatoriu (KO), iha Munisipiu Dili no Ministru Ensinu Superior Siensia no Kultura (MESSK) haruka ona sirkular.

Reitor UNPAZ, Adolmando Soares Amaral dehan, mezmu desizaun iha Konsellu Ministru (KM), Ministru Ensinu Superior mos haruka ona sirkular, para husu hahu 27 oras 00:00 to’o loron 2 fulan Setembru nee, Munisipiu Dili iha Konfinamentu Obrigatoriu, maibe prespetiva husi UNPAZ nian atu hatete deit katak, governu tenke hatudu sira nian kapasidade no vontade servisu, atu nunee bele halo atendimentu ba povu no nasaun iha rai doben ida nee.

“Ita haree ita nian governu loron ba loron, sira nian servisu mak extende deit, maibe iha forma seluk ita nian governu sira bele uza, oinsa ita bele halo referensia husi nasaun seluk, ita bele kaer ida nee, ita lori mai, para ita bele aplika fali iha ita nian rai, maibe ita nian governu lakohi hamosu forma foun, entaun bainhira iha ameasa ba moras ida nee, sira nian servisu mak extende deit, maibe forma seluk sira labele halo, ida nee hatudu lolos katak, governu ida nee la seriu halo atendimentu publiku ba povu no dezenvolvimentu ba rai ida nee,” dehan Adolmando ba STL, liu husi telefone, Kinta (26/08/2021).

Reitor Adolmando dehan, hanesan ema moris iha nasaun, bainhira desizaun ruma liu husi Konsellu Ministru, neebe mak hasai rezolusaun ruma, nee tenke kumpre, maibe triste haree governante sira nee, ohin no aban mos aprendizajen iha UNPAZ sei halao to’o loraik, tanba regras nee, hahu iha loron 27 oras 00:00.

Iha fatin seluk, Vise Reitor I, asuntu akademiku IOB, Antonio Soares Martins hatete, IOB mos sei kumpre regras husi MESSK, neebe deside ona suspensaun ba atividade prezensial, karik ba oin extende KO, nee kompetensia governu nin, maibe parte universidade kumpre deit saida mak governu hatun mai.*

Reportajen: Jacinta Sequeira

Editor: Ekipa STL

LEAVE A REPLY

Please enter your comment!
Please enter your name here