DILI, STLNEWS.co – Relasiona ho Atleta Timor oan nain 4 husi Federasaun Boxe Amadora Timor-Leste (FBATL), hetan deskualifikasaun husi Kompetisaun Asian Games ba dala 19, iha Hangzhou Xina, tanba nee Klubu Ell Matador Boxe husu Comite Olimpiku Nasional Timor Leste atu halo Klarifikasaun.
Tuir Reprezentante Klubu El matador, Abilio Orlando dos Santos hatete, notisia neebe publiku halo diskusaun konaba Atleta Boxe 4 neebe too tiha ona iha Xina, maibe la Kompete iha eventu Asian Games 2023 ba dala 19.
Nia dehan, hanesan reprezentante Klube no treinador sente triste, tanba informasaun katak, Modalidade Boxe Amadora Timor-Leste la priense rekizitu maibe CONTL nonok deit lakohi buka solusaun, tanba nee husu atu klarfika razaun konaba atleta sira la kompete.
“Tanba nee, husi Klubu Ell Matador Boxe senti tristi ho boxista Delio neebe lakon oportunidade boot iha kompetisaun Asian Games,” tenik nia ba jornalista sira iha Benfica Dili, Segunda (25/09/2023).
Nia hatete, husi FBATL prepara Atleta no CONTL mak organiza ikus mai atleta sira la partisipa, espera CONTL bele klarifika problema refere,tanba CONTL mak akompanha atleta sira, tanba nee sira iha responsabilidade, karik Timor Leste hanesan nee bainhira hatudu iha mundu desportivu nian.
Nia haktuir, durante nee atleta boxista Timoroan, Delio Mouzinho hamutuk ho nia kolega sira prepara masimu tebes.
Entretantu, Atleta husi Federaasaun Boxing Amadora Timor-Leste, Delio Anzaqeci Mouzinho tristi, tanba modalidade boxing diskualifika iha Asian Games 2023 iha sidade Hangzhou Xina, tanba tarde tuir Thacnikal Meeting.
“Ami sai husi Timor Leste iha loron 21 fulan Setembro tinan nee konaba Federasaun dada rifa nee ami la hatene, ami too iha nee mak foin hatene boxing dada rifa hotu ona nee mak ami agora la joga ona, entaun usi neebe mak sala ami too agora seidauk hatene” dehan nia.
Nia dehan, sira nain sente triste tebes tanba mai ho misaun neebe mak reprezenta Timor Leste atu mai tuir eventu internasional nee, maibe mai tarde.
Enkuantu, too Nutisia nee publika STL seidauk halo konfirmasaun ho parte CONTL, tanba daudaun nee parte CONTL sei iha hotu Hangzhou Xina.
(mar)
