DILI, STLNEWS.co – Ekipa Bita sai kampiaun ba tasa Xanana CUP 2023, hafoin halakon adversariu ekipa husi Treinador ho skor 2-1.
Jogu entre ekipa rua nee realiza iha estádiun munisipal Dili, Sabadu loraik (16/09/2023).
Ekipa rua tama iha ekipa kampu laran hodi lansa atake bola ba mai, tanba nee iha jogu Primeira parte ekipa Bita Ba domina liu jogu refere tanba nee sira fura golu rua liu ba rede adversariu ekipa Treinador, guarda rede adversariu Ekipa Treinador neebe la konsege kontrola ho diak ikus mai rezulta kedas golu.
Enkuantu golu 2 nee marka husi jogador Carol Nascimento nomos Boaventura, maski Ekipa Treinador halao esforsu atu resposta hikas golu ba rede Bita Ba, maibe bola refere salva hotu husi guarda rede Bita Ba FC, too jogu primeira parte termina skor mantein 2-0.
Entretantu jogu refere asiste direita husi Primeiru Ministru Kay Rala Xanana Gusmão, Ministru Juventude Desportu Arte no Kultura Nelio Isac Sarmento, parte FFTL, patrosinador nomos adeptus inklui jogador klubu sira.
Hafoin oras deskansa termina hodi kontinua hikas jogu segunda parte, Ekipa Treinador esforsu hodi halo hikas mundansa ba sira nia jogu, tanba nee sira resposta kedas golu ida ba rede adversariu ekipa Bita Ba, liu husi jogador Edith Xavio, husi rezultadu nee skor nakfilak ba 2-1, ekipa rua nafatin halao atake bola ba mai iha kampu laran, laiha tan golu ruma mak ekipa rua nee produz, husi rezultadu lori ekipa Bita sai kampiaun ba Taxa Xanana CUP 2023, no ekipa Treinador sai segundu lugar.
Ba jornalista sira Treinador, Bita Ba FC Nuno Carvalho Orgulhu, tanba sai Kampiaun ba Kompetisaun Xanana CUP tinan ida nee.
“Ami mai kompete iha nee lori ami nia aldeia nia naran, Bita Ba FC i ami orgulhu loos, tanba ami sai kampiaun ba kompetisaun nee,” dehan nia.
Nia afirma, sira nia esperensa ba oin mak atu motiva nafatin jogador sira, oinsa atu sai jogador neebe mak Profesional hodi hetan fatin diak ruma.
Entretantu Jogador ekipa Treinador, Miro Baldo Bento hatoo parabens ba ekipa Bita Ba, tanba konsege sai primeiru lugar hodi halakon Ekipa Treinador.
“Jogu ohin ami derota, hau sente normal, tanba nee jogu ami orgulhu, tanba ami ekipa treinador ho idade neebe mak avansadu maibe konsege sai segundu lugar,” dehan nia.
Hafoin jogu termina, ekipa Komisaun Organizadora distribui kedas premiu ba ekipa manan nain sira.
(mar)
