DILI, STLNEWS.co – Legendariu Mundial Boxista Filipino, Manny Pacquiao hasoru Primeiru Ministru (PM) Kay Rala Xanana Gusmão, hakarak dezenvolve desportu boxing iha Timor Leste (TL) hodi promove modalidade boxing.
Boxista ho naran bolu (nickname) “Pacman” nee hatete, agradese bele hasoru PM Kay Rala Xanana Gusmão no koalia oinsa promove desportu boxing iha Timor-Leste.
“Iha planu atu dezenvolve boxing iha tinan 2023-2024, ida nee objetivu konvida husi Governu Timor Leste, espera relasaun bilateral entre Timor-Leste ho Filipina sai relasaun diak, hodi dezenvolve duni boxing iha Timor,” dehan nia ba jornalista sira bainhira remata hasoru malu ho Xefi Ezekutivu Kay Rala Xanana Gusmão iha Palasiu Governu, Dili, Sesta (29/09/2023).
Pacquiao mos dehan, planu boot mai Timor-Leste nee atu dezenvolve boxing no ajuda boxista Timoroan sira, motiva no eduka atu bele kompete iha kompetisaun mundial.
Entretantu, PM Kay Rala Xanana Gusmão iha enkontru nee hatete, nia agradese ho vizita husi boxista legendariu Manny Pacquaio tanba bele suporta liu tan modalidade boxing iha Timor-Leste no espera katak modalidade boxing iha futuru bele halo morin TL nia naran iha kompetisaun mundial.
(gui)
