DILI,STLNEWS.co – Atleta nasional husi modalidade Boxing Timor Leste, Delio Mouzinho iha esperansa sei sai primeiru lugar iha kompetisaun Sea Games neebe realiza iha Kamboja tinan nee.
Nia dehan, uluk nanain fo obrigadu ba povu Timor Leste neebe fo ona suporta liu husi orasaun material,” Hau iha esperansa boot no hau sei la fila ho mamuk, buat neebe mak ita rai doben nia hakarak, hau sempre esforsu neebe tarjetu tenki primeiru lugar,” tenik nia ba jornalista sira iha Aeroportu, Nicolao Lobato, Dili, Kuarta nee (03/05/2023).
Delio hatete, nia iha forsa no vontade atu kompete, tanba tempu to’o ona atu hatudu ba povu Timor Leste liu husi prestasaun hirak nee.
Nia dehan, tinan kotuk iha Sea Games Vietnam hetan ona segundu lugar, maibe esperansa ba tinan nee tenki hetan primeiru lugar.
Iha sorin seluk, Treinador Modalidade Karate-do Timor Leste, Andreas Quefi hatete, sira mos iha esperansa maski la masimu liu, maibe iha esperansa oituan bainhira ba kompete tenki hatudu rezultadu diak.
“Ami fiar aan, tanba durante preparasaun iha tempu naruk la masimu liu, maibe ami sei hatudu rezultadu diak,” dehan nia.
Nia parte mos husu ba povu Timor Leste atu halo orasaun hodi akompanha sira durante iha kompetisaun.
Entretantu, Atleta Felisberto de Deus hatete, hanesan atleta preparadu ona hodi ba kompete iha Sea Games tinan nee.
“Hau hakarak duni hetan primeiru lugar, maibe hau labele dehan katak atu hetan kedas medalha, maibe buat hotu sei iha nakukun laran,” dehan nia.
(mar)
