DILI, STLNEWS.co – Diretor Jeral Administrasaun Finansa, Ministeriu Edukasaun Juventude no Desportu (MEJD), Antoninho Pires hatete, desportu eskolar kada eskola sira implementa hela, maibe dala ruma kompetisaun sira mak laiha.
“Desportu eskolar nee iha eskola sira lao hela entermus pedagojika, soke kompetisaun mak la lao, maibe konaba materia hanorin nee lao hela inklui pratika estudu mos iha,” tenik Antoninho Pires ba STL iha nia knaar fatin MEJD, Dili, Segunda nee (25/07/2022).
Nia hatete, konaba ba atu halo kompetisaun nee laos husi Ministeriu Edukasaun mesak, maibe tenki liu husi MEJD.
Enkuantu, Diretor Eskola Baziku Sentral (EBC – sigla portugues), Bidau Akadiru Hun, Mateus Pinto hatete, sira halao atividades desportu eskolar bazeia ba orariu neebe mak iha, tanba orariu nee husi eskola mak prepara, liu-liu kompetensia husi profesores desportu ninian, tanba loron rua nee mak estudante sira halao atividades refere.
“Hau hanoin desportu eskolar nee ami fo orientasaun beibeik ba profesores neebe mak hanorin iha area desportu, tanba nee atividades desportu eskolar ami halao iha loron Sesta no Sabadu, maibe bainhira atividades desportu husi edukasaun ka husi ministeriu seluk, nee husi eskola sempre prepara ninia estudante sira,” dehan nia.
(mar)
