DILI, STLNEWS.co – Ekipa AD SLB Laulara susesu halakon adversariu Academica FC ho skor 2-0, iha jogu kontinuasaun ba primeira divizaun Liga Timorense epoka tinan nee.
Jogu entre ekipa rua nee realiza iha Estádiun Munisipal Dili, Tersa nee (14/03/2023).
Ekipa rua nee tama iha kampu laran sentra bola, hodi halo kedas lansa atake ba mai iha kampu laran, maibe ekipa AD SLB Laulara neebe mak solidu tebes amesa kedas rede adversariu Academica FC iha deit minutu 6, ekipa husi AD SLB Laulara lees kedas rede adversariu Academica FC.
Enkuantu, golu refere fura husi jogador Michel Hutabarat, bainhira bola barulhu iha area baliza Academica FC, ho nunee skor muda ba 1-0.
ekipa Academica FC neebe mak sofre ona golu la lakon vontade, tanba nee sira nafatin esforsu hodi lansa bola ba iha rede adversariu AD SLB Laura, maibe guarda rede konsege kontrola bola diak, ho nunee la rezulta golu ruma, ekipa rua nafatin lansa atake ba mai iha kampu laran too jogu primeira parte termina skor mantein 1-0.
Hafoin oras deskansa termina, hodi kontinua hikas ba jogu segunda parte nian, ekipa Academica FC halo hikas mudansa ba sira nia ekipa hodi fo amesa ba rede adversariu AD SLB Laulara, maibe defeza no guarda rede konsege salva hotu bola refere, iha minutu hirak nia laran AD SLB hetan hikas fali bola hodi kontra atake makaas ba adversariu Academica FC, maibe bola neebe mak jogador AD SLB Laulara lansa aas tiha husi rede, ekipa rua nafatin esforsu iha minutu 82, jogador AD SLB Laulara Kornelis Portela aproveita bola ho diak hodi lansa ba rede adversariu Academica FC, ikus mai rezulta kedas golu ida ho nunee skor kontinua muda ba 2-0, maski ekipa Academica FC hetan oportunidade barak, maibe oportunidade sira nee la konsege ezekuta ho diak, too jogu remata vitoria ba AD SLB Laulara no adversariu Academica FC fila ho derota hodi hein fali jogu tuir mai.
Ba jornalista sira, treinador AD SLB Laulara, Juliao Monteiro hatete, sira manan maibe la satisfaz ho jogador sira joga iha kampu laran.
“Ami manan, maibe ladun satisfaz ho ami nia jogador sira nia jogu, tanba sira la halo tuir saida mak durante nee ami aprende, sira la implementa fali,” katak nia.
Iha sorin seluk, treinador Academica FC, Lusinho do Santos Saco hatete, sira derota ho AD SLB Laulara, maibe hau nafatin foo korajen ba hau nia jogador sira, ba oin ami sei hadia tan ami nia jogu,” katak nia.
(mar)
