Governu Foun Tenki Kria Kondisaun Dignu Ba Atleta

DILI, STLNEWS.co – Atleta husi modalidade Paralimpiku Timor Leste husu governu foun atu kria kondisaun dignu ba sira.

Kesataun nee hatoo husi Atleta Foti Besi, Silveiro Martins Soares ba STL iha Aeroportu Komoro, Dili, Tersa nee (30/05/2023).

Nia dehan, governu foun neebe mak sei mai tenki tau atensaun ba ema ho defisiensia iha desportu, liu-liu mak tenki kria kondisaun hanesan fatin ba treinamentu atu nunee ita reprezenta Timor Leste nia partisipasaun iha jogu internasional sira ho prestasaun neebe mak aas no hodi rekolha medaliha,” dehan nia.

“Dala barak sira ladun kria kondisaun neebe mak diak ba atleta ba eme ho defisiensia sira,” dehan nia.

Nia akresenta, governu labele hein jogu internasional sira iha mak foin orienta atleta sira halo preparasaun, maibe halo oinsa mak kria kondisaun neebe mak dignu, atu nunee atleta sira kontinua halo preparasaun molok atu ba kompete iha jogu ruma.

Iha fatin hanesan, Prezidente Para Natasaun, Cesaro da Silva hatete, governasaun foun mai liu-liu Sekretariu Estadu Juventude no Desportu tenki prioritiza Atleta Paralimpiku sira.

“Hau hanoin desportu ba ema ho defisiensia hatudu istoria lubuk ida ona, liu-liu halo record boot, tanba nee mak tenki promove sira,” katak nia.

Nia hatete, tanba atleta sira nee presiza ekipamentu no akompanhamentu.

Nia akresenta, tanba nee mak governasaun foun mai presiza diskuti hamutuk ho Paralimpiku atu bele hamutuk saida nesesita ba atleta ho defisiensia iha Timor Leste.

Entretantu, Atleta Para Atletizmu Timor Leste, Teofilo Freitas mos husu ba governu foun neebe sei mai atu investe nafatin ba setor desportu, liu-liu modalidade sira neebe iha prestasaun nomos loke eventu rai laran para bele hetan atletas no jogador potensia sira, hodi reprezenta Timor ba kompete iha liur.

(mar)

LEAVE A REPLY

Please enter your comment!
Please enter your name here