DILI, STLNEWS.co – Ministeriu Juventude Desportu Arte no Kultura (MJDAK) sei kordena ho Ministeriu Edukasaun (ME), hodi realiza kompetisaun jogu desportu eskolar.
Tuir MJDAK, Nelio Isac Sarmento katak, Programa nee diak, atu organiza desportu eskolar nee tenki haree mos kondisoens iha nasaun ida nee.
“Ita iha programa ida bolu dehan desportu eskolar, ita tenki iha inisiativa kordena ho Ministeriu Edukasaun atu haree alunus sira feriadu hodi prienxe sira nia feriadu nee ho extra kurikuler, liu husi jogu eskolar,” dehan nia ba STL iha Palasiu Governu, Tersa (03/10/2023).
Nia dehan, parte MJDAK preparadu hodi organiza eventu jogu eskolar nee, agora hein fali mak kordenasaun entre Ministeriu rua nee.
“Se bele halo iha tinan ida nee, se lae muda ba tinan oin,” hakotu nia.
Iha sorin seluk, Profesor Desportu husi Eskola Sekundaria Jeral Nicolao Lobato, Atanasio Pinto, husu Ministeriu Juventude Desportu Arte no Kultura inklui Ministeriu Edukasaun atu tau importansia ba jogu eskolar.
“Jogu eskolar durante tinan 5 nia laran seidauk akontese, neebe husu ba IX Governu atu tau importansia ba jogu eskolar,” dehan nia.
Nia hatete, liu husi jogu eskolar mak bele promove estudante sira neebe mak iha talentu ba desportu.
Entretantu, Estudante Mario da Costa mos hatete, jogu eskolar nee importante atu promove estudante sira nia talentu.
“Ami estudante sira aprende teoria konaba desportu, maizumenus kria mos jogu eskolar, atu nunee ami bele espresa ami nia talentu,” dehan nia.
(mar)
