DILI, STLNEWS.co – Sekretariu Estadu Juventude no Desportu (SEJD) planeia sei apoiu ekipamentus ba eskola sira neebe mak eziste iha teritoriu nasional.
Lia hirak nee hatoo husi Diretor Nasional Desportu SEJD, Cesarino da Silva ba STL iha nia knaar fatin SEJD, Dili, Segunda nee (20/03/2023).
Nia dehan, konaba jogu eskolar iha ona asosiasaun desportu eskolar nivel neebe estabelese ona iha munisipiu, tinan kotuk hahu estabelese ona iha munisipiu balu, tinan ida nee sei kontinua servisu hamutuk ho asosiasaun, depois bele realiza atividade desportu eskolar, ho modalidade sira mak hanesan atletizmu, voli, futebol, futsal no basket.
Nia hatete, konaba eskola sira neebe mak sei preokupa ho fasilidade desportu nian, tanba nee iha tinan kotuk distribui ekipamentus balu ba eskola sira, tinan ida nee mos planeia atu servisu hamutuk liu husi kooperasaun sira hanesan FIFA, iha fulan kotuk hola parte iha konfrensia ida iha Singapura, atu hetan mos apoiu husi FIFA liu husi Federasaun Futebol Timor Leste ho SEJD, nee ligadu ba iha desportu eskolar.
“Entaun ita sei apoiu ekipamentus sira nee ba iha eskola sira neebe mak daudaun nee eziste iha teritoriu atu bele distribui ba sira, atu nunee sira bele intensivu liu tan sira nia treinu iha desportu nian,” tenik nia.
Nia salienta, FIFA iha komitmentu makaas, katak sira sei apoiu ba fasilidade sira liu-liu bola hodi distribui ba eskola sira.
Entretantu, Diretor ESJ 4 Setembru, Martinho de Menezes hatete, eskola 4 Setembru materia konaba desportu iha teoria inklui mos pratika, maibe problema mak fasilidade sei menus.
“Desportu nee iha eskola sira iha hotu, maibe fasilidade mak sei araska oituan, tanba nee mak profesor balu tau materia desportu nee iha Sabadu, maibe iha loron Sabadu talvez estudante sira balu la mai,” tenik nia.
(mar)
