DILI,STLNEWS.co – Atu tama ba iha Association of Southeast Asian Nations (ASEAN), Timor Leste (TL) tenki prepara uluk rekursu umanu hodi bele kompete ho nasaun seluk.
Hau senti TL nee ita tama iha era ida neebe mak globalizasaun teknolojia, hakarak ka lakohi tenki kompete. Atu lori aan ba iha neeba, tanba ita ukun aan iha era ida neebe mak kompetetivu tebes, ita bele dehan, iha ninia vantajen no desvantajen nee iha, maibe hau senti ida nee diak, oinsa mak atu halo servisu makaas liu tan.
Ema balun la preparadu, sempre iha, maibe tenki lao nafatin ba oin, tanba ida nee hanesan oportunidade ida atu kompete, oinsa ita hotu hasae estandar nee,” dehan Diretor ETDA, Januario M. Neto Mok ba STL iha nia knaar fatin, Tersa nee (11/04/2023).
Nia dehan, hakarak ka lakohi tama iha zona ida neebe tenki hamriik, no tenki luta duni, tanba nee TL tenki preparadu iha setor hotu. Sira koalia konaba sentru formasaun nian tenki kompete. Tama iha ASEAN atu kompete oinsa, investe iha rekursu umanu, se laiha oinsa mak bele kompete ho nasaun seluk neebe partensia ba ASEAN ninia.
Nia dehan, governu tenki investe iha area neebe TL iha kapasidade bele duni, tanba investe iha setor turizmu nee importante tebes, tanba setor ida nee bele fo servisu ba ema barak, bele involve ema hotu hodi bele hadia sira nian ekonomia.
“Hau hanoin instituisaun lokal sira neebe mak konsentra aan iha area formasaun sira mos tenki hadia kualidade tuir standar neebe mak iha, para bele produs joven Timor oan neebe kualifikadu hodi bele kompete,” haktuir nia.
(dom)
