Tinan Nee Seidauk Halao Atividades Desportu Eskolar

DILI, STLNEWS.co – Tinan ida nee eskola sira iha Munisipiu Manatutu seidauk halao atividades desportu eskolar, maibe atividades refere halao iha tinan kotuk.

Hatete Diretor Servisu Edukasaun Munisipiu (SEM) Manatutu, Graciano de Jesus Baptista iha Manatutu ba STL liu husi telefone, Kinta nee (18/05/2023).

“Ami iha Manatutu too agora seidauk, SEJD rasik foin halao iha munisipiu tolu, nunee iha Manatutu too agora ami seidauk iha informasaun konaba desportu eskolar ninia, entaun ami nian eskola sira tinan nee ami seidauk halao atividades desportu eskolar iha ami nian eskola sira Munisipiu Manatutu,” katak nia.

Nia dehan, sira orienta ona ba eskola sira atu bele nomea profesor ida para bele responsabilidade ba iha atividades nee, maibe ba atividades desportu eskolar enjeral too agora sira seidauk simu informasaun ruma.

“Tinan ida nee ami seidauk halao atividades desportu eskolar, maibe iha tinan kotuk ami halao, konaba ekipamentus ba desportu eskolar mos sei falta, ami nian iha eskola balun halo ona proposta ba edukasaun, maibe buat nee tenki lao hamutuk ho SEJD, ami tenta halo ona proposta, maibe too agora seidauk halao,” afirma nia.

Nia sublina, konaba kampu iha eskola balun hahu ona, nee kuaze eskola hotu iha ona, nunee mos ekipamentu sira hanesan bola, redi mos seidauk iha, inklui farda neebe mak atu uza hodi halao atividades desportu mos seidauk iha.

Iha fatin seluk, Diretor EBC Bidau Akadiru-hun, Roberto Cristovao Jeronimo hatete, atividades desportu eskolar nee hanesan atividades extra ida, hodi bele hasae talentu estudantes sira neebe iha talentu ba atividades desportiva ninia.

“Hau hanoin ita nian atividades desportu nee hanesan atividades extra ida, tanba ita nian estudantes balun neebe mak iha talentu diak ba atividades desportu ninia;” tenik nia.

Iha fatin neebe la hanesan, xefi departamentu edukasaun inkluzivu husi MEJD, Jose Monteiro dehan, hanesan baibain dehan ona katak, asuntu ida nee laos kompetensia husi diresaun ida nee, maibe nee DNASE nian kompetensia.

(jac)

LEAVE A REPLY

Please enter your comment!
Please enter your name here